Nimin khan Bung Bangla-a State Institute of Hotel Management chu tourism minister-in a tlawh a. Tourism minister chuan kum 2008-09 khan SIHM building sakna tur sum hi cheng nuai 800 sanction a nih thu leh, sawrkar thar a lo din leh hnu 2019-ah SIHM danin a phut angin Cabinet-in SIHM atan post 32 siamin a taka a function nan tan a la zui a; Covid hripui avanga harsatnain hmalakna a timuang chungin theihtawp chhuah azarah equipments ngai turte lei thar a ni leh, tiin a sawi a.
-- Advertisement --
SIHM hi 2009 February thla atanga sak tan kha niin, tender koh a ni lo va, PWD Project Division III-in departmental-in an thawk a, thla 18 chhunga zawhfel tur tih ni mah se, thla 55 hnuah September 2013 khan zawhfel chauh a ni. SIHM atan hian sawrkar laipui chuan cheng nuai 1,000/- (construction atan 800, equipments atan 200) a sanction a, hei hi release vek tawh a ni bawk. Equipments hi tunhma khan lei a la ni lo a nih chuan kum kha leh chen equipments man tur cheng nuai 200 kha engtia kawl that nge a nih? Equipments te hi an lo lei tawh a, a lo chhiat hman tawh avangin tunah a thar lei a ni leh tihna nge? Chuti ni se, tuna equipments leina sum hi khawi ami nge tihte pawh zawhna awm thei a ni ta a ni.
SIHM building hi sak zawh a nih 2013 hnu lamah pawh a nihna tur anga kalpui theih lohvin a awm chho reng a. Kum 2018-a sawrkar thar a lo pian hnuah pawh chhunzawm lohvin a awm zui a, hei hi Covid hrileng vanga sawi a ni a, hrileng a ziaawm hnuah heti hian hmanrua mamawh tul lei a han ni leh ta a. Kumin chhunga course engemaw ber tan thei tura tourism minister-in a sawi hi thleng dik ta se, he institution hi sak tan a nih atanga kum 14 hnuah a takin a function ve dawn chauh tihna a ni.
Pawi ta ber chu, kum kha leh chen function thei lova he institution a awm chhung khan, thalai tam takin an tuar a, kum sawm chuang teh meuh mai thalaite eizawnna tur rahbehsak niin thalai za rual fe mai hnungkhirhsak an ni, tihna a ni.
Ram hruaitute hian an tuizawng leh an lawmzawngah chuan hna an thawk chak thei khawp mai. Kum tin lo hal kang dur dur thin tana tangkai lem lo Golf Course pawh zawh hun tur bitukah an zo thei mai; mipui tam zawkin an tangkaipui tur lamah hian an tuan a fum hlauh thin nge?