Silchar-ah Mizo bum thei an tam

Silchar-ah Mizo bum thei an tam
Silchar-ah Mizo bum thei an tam a, bum theih Mizo zuk talbuai an tam bawk. An bumna hi thil mak tak tak a ni a, sum lama hlawkna um vang a ni ber. Ruihhlo tawlhruk kaihhnawiha man pawh an awm deuh reng.
The Aizawl Post-in a zawh chiannaah Silchar Mizoram House deputy resident commissioner Lalhmingliana chuan, Silchar-a zuk talbuai bum theih Mizo an awm deuh reng a, an bumna lah thil mak pui pui a tam hle tih a sawi. Alaidum lei duh anga insawi, social media (whatsapp leh facebook) lama an rawn dawr, Guwahati atanga lo chho tura anga insawiten Mizoram lam mi an rawn bia a, an leina ngam zat nia an sum tawktarh pawh an tam thin hle tih a sawi. Gold-a sumdawnna lama inbumna, lei chi (fertilizer) lama inbumna, lirthei lei leh hralh lama inbumna chu a tam zual tih a sawi. ‘Pillar’ an tih mai, hmanlai lung sakhat tak, man to taka lei duh anga insawia inbumna chang zui ta te pawh an awm nia sawiin, henga an indawrnaah hian pawisa lem pek chang an nei a, a dik leh dik loh test phawt a ngai, tia heng an buma te tikhawtlai a, an sum neih sa an hman zawh thak hnua engmah hlawkna nei loa kut benga haw leh ta pawh an awm fo tih a sawi.
Zawhna a chhan danin, Myanmar lama Zohnahthlakte nen kan intlawhpawh nasat hnu ah hetianga bumna tawk hi an tam zual deuh nia ngaih a ni tih a sawi a. Zokhawthar, Siaha leh Lawngtlai lam atanga lei chi, oil, dal adt. a hlawma rawn lak tum sumdawng, Silchar-a an mi dawrte, a tlangpuiin ‘middle man’ ten an bum tak an tam tih DRC hian a sawi a. YMA Silchar Branch hruaituten an lo buaipui zui, a then phei chu bum an tawh hmaa an chhan hman pawh an awm thin tih a sawi a ni.
Heng ni lo, heroin leh ganja tawlhruk avanga thalai man tawk leh bum tawk an awm bawk tih Lalhmingliana hian a sawi a. Heng ruihtheih thil bakah gold-a tawlhruk kaihhnawiha Silchar Jail-a tang mek Mizo 58 an awm tih a sawi a ni.
Case engemawzatah hi chuan, a bumtute hian Delhi/ Kolkata/ Guwahati atanga rawn chho tur angin an insawi a, heng atang hian an rawn be tak tak em tih erawh finfiahna a awm lo tih sawi a ni.
YMA Silchar Branch hruaitute sawi danin, kumin chhung hian Mizo hnam harsatna hrang hrang tawk leh ruang buaipuiin vawi 60 chuang an che chhuak tawh a, heng avang hian bungraw dahna tur an mamawh tih an sawi a ni.