Kum 2037-ah India developed ram ni ang ti

Kum 2047-ah India chu developed ram a ni hman tawh ang tiin Defence Minister Rajnath Singh chuan May 15 khan sawiin technology lamah hmasawnna neih zui a pawimawh thu a sawi bawk a.
India chu self-reliant a nih mek tawh thu sawiin kum 2027-ah India chu world economy-ah pathumna a ni tawh ang tiin Singh chuan Defence Institute of Advanced Technology (DIAT) tena event an huaihawtnaah a sawi a.
“Khawvel chu chak takin a inthlak danglam mek a. Defence sector-ah pawh inthlak danglam a nasa a ni. Defence sector lamah harsatna tam tak a awm thar a, a bik takin cyberspace lamah a ni zual,” tiin Singh chuan a sawi a. “Mahse, thil inthlak danglam karah technology sang zawk nei turin hma kan lak zel a ngai a. Harsatna a awm a nih chuan a chinfelna a awm zel a. Technology lama hmasawn leh zual turin hma kan la mek a ni,” tiin Minister chuan a sawi bawk.
Self-reliance chungchang sawi zuiin Singh chuan ram danga innghat lo kan nih a ngai a ti a, “Kan tum ber ni rih chu mamawh bulthutte kan siam chhuak anga kan thawn chhuak bawk ang tih a ni,” tiin a sawi a.
Ram chhunga thil siam chhuah chuan hna a siam zel dawn a ti bawk a. “Prime Minister Narendra Modi kaihhruaina hnuaiah kum 2047 ah chuan India chu developed ram a ni tawh ang,” tiin a sawi bawk.
Rajnath Singh chuan, “Defence bungrua thawnchhuah lamah hma kan sawn nasa a. Kum 2014 kha chuan he sector a kan thawnchhuah chu Rs 900 crore hu vel a ni a, tunah chuan Rs 16,000 crore ah a kai tawh a ni. Chawkluh pawh tihhniam ni tawhin India chu start-up hmunpui ni tawhin innovative ideas te kan neih belh zel a. Rifles, missiles leh aircraft te India ramah siamin a awm mek,” tiin a sawi bawk.
“India chu mahni intodelh ram a ni mek a. Khawvel economy tha ber a nih theihna pawh namnul theih chi a ni lo,” tiin a sawi bawk a. “Economic experts te chuan kum 2027 ah India chu world economy-ah pathumna a ni ang an ti a. Chumi tihlawhtling tur chuan kan thawh a ngai a ni,” tiin Rajnath Singh chuan a sawi bawk.