Kum 32 chhung kum tin lehkhabu

Lehkhabu chhiar miah lo kum tluan a awm theih mai thei a, thenkhat tan chuan kum khat chhunga lehkhabu pakhat chhiar chhuah pawh tum fe tham a tling mai thei. Kum tina lehkhabu ziah phei chu, mi tam zawk fe tan hi chuan a tuma tum ngam chi a ni lo ang. Prof Laltluangliana Khiangte chuan kum tin lehkhabu a ziak a, chutiang chuan kum 32 chhung hun a hmang tawh.
Mizo writer Laltluangliana Khiangte hian 1993 khan a lehkhabu hmasa ber “Lehkhabu Ramtiam” a chhuah a, chumi hnuah chuan kum tin lehkhabu a la nei ziah. Kuminah pawh a chhuah fel leh tawh.
2020 April-ah khan a dam lo vak a, hun engemaw chen chu a bawksawp zui bawk. A dam loh hma hian lehkhabu a lo peih hman a, hemi kum pawh hian lehkhabu thar a chhuah thei hlauh. A kum lehah chuan tha tharin lehkhabu thar a ziak leh thei. 1993 hnuah lehkhabu hi kum tin a la ziak thei ta zel.
Ama irawm chhuak, ama puala a ziah bakah lehkhabu edit a nei teuh tawh a, mi dang nena inchhuah tawm a nei teuh tawh bawk. Ama lehkhabu liau liau hi bu 50 a chuang tawh a, a edit hi bu 70 chuang a ni tawh. Chung bakah chuan a hming chuanna lehkhabu 100 chuang a chhuak tawh bawk.
“Lehkhabu hetiang zat ka chhuah ve thei hi ka hlimpui a, vannei ka inti khawp mai,” a ti a, “Ziah loh hi ka la ngahin ka hria a, ziah zel theih pawh ka duh a,” a ti bawk.
A naupan laia writer nih tum a ni lo a, a chhungte duh danin MBBS zira missionary-a kal a tum thin. MBBS seat a hmuh fel vek tawh hnuah English literature zir a chak tlat a, chumi lamah chuan kalin PhD thlengin a zir ta a ni.
A pu (a pa pa) Rev Liangkhaia bula awm, a pu enkawl thin a ni a, chu chu thu leh hla lam kawng zawh duhna rilru a put tan dan a ni. “Ka pu enkawltu ka ni a, ka pu kha chhiar reng mai, ziak reng mai a ni a. Chu chu ka kai a ni ang, ka pu khan a ziah leh a chhiar lam min titui a,” tiin a chanchin a sawi a, a pa u L Biakliana, Mizo writer hmasa hming lam riin, “Ka pu leh mi dangte pawhin ka papuia chanchin an sawi thin a, ngaihnawm ka tiin ka rilru a hneh thin. Ka pu leh ka papuia te hi writer nih chakna keimaha tuhtu chu an ni,” a ti.
Drama lam a ziak nasa a, Mizo drama chanchinah PhD a zawh hnuah drama a ziak zui bawk. “Drama hi a hralh a kal lo ber, kan mamawh ber niin ka hria a. A hralh kal lo ber drama hi hnam tan ka uar a ngai a ni ka ti a,” tiin drama lama a kal nat chhan a sawi.
Heti taka lehkhabu a buaipui chhan hi “Kan hnam tana ka tangkai ve theihna nia ka hriat vang,” tiin a sawi.
“Kan hnam literature, culture leh tawng tihhmasawn kawngah theihtawp chhuah ve ka duh a. Chu chu thuziak leh lehkhabu chhuah lama ka inhman chhan chu a ni,” a ti a, “Mizo hnam ka hmangaih avangin ziah zel ka duh a, Mizo hnam ka hmangaih tana tangkai tur thil hi ziaka dah ka duh a ni,” a ti bawk.