Kum 328 a upa cognac hmuchhuak

Kum 328 a upa cognac chu Guinness World Records-in khawvela cognac upa berah a puang. Cognac chu zu, brandy chi khat, Cognac, France-a an bilh leh an thlawrna hmunhma hming chawia Cognac an tih tak a ni a, grape atanga siam a ni.
He cognac upa ber an tih tak hi 1696 Jules Robin Cognac a ni a, Dutch collector Lars Janssen a ta niin, ani pawh hian a zu chi hrang hrang dahthatna hmun atanga a hmuhchhuah thar a ni. A hmaa cognac upa ber an tih thin chu 1720 Caves Du Restaurant a ni a, hei ai hian kum 24-in a upa zawk. 1720 Caves Dr Restaurant hi Vietnamese collector Nguyen Dinh Tuan Viet ta a ni ve thung.
Record hi a bottle-a an thun hun ni lovin, an thlawr (distilled) hun atanga teh thin a ni. He cognac paw hi 1696 a thlawr kha niin, France-a King Louis XIV rorel lai leh England-a King William III lal lai a ni a, mahse, a bottle-a an thun hi chu kum 200 hnu, 1880s emaw 1890s-ah emaw a ni vel chauha, a zu hralh chhuaktu Jules Robin leh Edmond Jaulin te hian 1850 khan an company an din chauh a, a zu um a ‘1696’ tih inziak pawh hi an company din hun ni lovin, a cognac siam kum zawk a ni.
1890s tawp lamah company atanga a chawlh dawnah Jaulin hnenah he bottle hi Robin hian ngaihhruih nan a pe a, Jaulin-a tupa Edmond chuan 1950s khan sum lama harsatna a tawh avangin cognac collector Pierre De Lannoy hnenah a hralh a, anni hian 2001 khan collector dang, Christian Vigneron hnenah a hralh leh a, Christian hian Lars hnenah 2018 khan Euro 1,42,500 (dollar 1,58,000)-in a hralh leh ta a ni.