Box office-ah Deadpool & Wolverine a No.1
North America-ah Labor Day weekend a ni a, weekend ni li chhung hun an hmang a, mahse, Labor Day weekend hi cinema hall lamah mi an buk ngai tehchiam lo a, nipui tawpna a nih avangin thildangah an inhmang nasa zawk thin a, kuminah pawh chutiang tho chu a boruak a la ni. Hetiang karah ian Deadpool & Wolverine-in North America-ah cinema hall ticket hralhna atangin dollar maktaduai 600 a la lut tling ta a, film tlangzarh tawh zingah US-ah dollar maktaduai 600 chin la lut thei 16-na a ni.
Fim tlangzarh thar langsar deuh chu indie biopic ‘Reagan’ niin, he biopic hi Dennis Quaid channa a ni a, Paul Kengor-a lekhabu ziah ‘The Crusader: Ronald Reagan and the Fall of Communism’ tih behchhana chan a ni a, he film hian opening weekend-ah dollar maktaduai 7.4 la lutin box office No.4 a ni. Film tlangzarh thar dang AI-themed horror movie ‘Afraid’-in dollar maktaduai 3.7 la lutin No.9 a ni bawk.
Deadpool & Wolverine hian tun weekend kalta khan North America-ah cinema hall ticket hralhna atangin dollar maktaduai 15.1 la lut lehin box office No.1 a ni a, tihian US-a a lak luh zawng zawng dollar maktaduai 603.8 a tling tawh a, US pawnah dollar maktaduai 29.2 lak luh belhin, US pawna a lak luh zawng zawng nen a vaiin dollar tluklehdingawn 1.258 a tlin ta bawk.
Alien: Romulus-in dollar maktaduai 9.3 la lut lehin No.2 a la ni a, he film pawh hian US-ah dollar maktaduai 91 a la lut tling tawh a, US pawna a lak luh nen chuan dollar maktaduai 293.5 tlin tawhin, Alien franchise-ah sum lak luh tamah pahnihna a ni pha tawh.
Blake Lively leh Justin Baldoni te channa ‘It Ends With Us’-in dollar maktaduai 7.425 la lut lehin No.3 a la ni a, he film pawh hian US-ah dollar maktaduai 135.8 la lut tawhin, US pawnah dollar maktaduai 150 a la lut tawh bawk a, a vaiin dollar maktaduai 283.7 a tlin ve der tawh bawk.
Box office top 10:
1 Deadpool & Wolverine $15,184,000
2 Alien: Romulus $9,324,000
3 It Ends With Us $7,425,000
4 Reagan $7,400,720
5 Twisters $7,160,000
6 Blink Twice $4,687,000
7 The Forge $4,600,000
8 Despicable Me 4 $4,080,000
9 Afraid $3,700,000
10 Inside Out 2 $2,770,000