Kum 4 chhungin Mizorama chhiatna liantham thlenga hloh zat vbch. 500

Kum 2021 atanga 2025 chhunga Mizorama chhiatna liantham zual thlenga thil chhia/ thi chu a hlutna chhutin cheng vaibelchhe 656.76 a ni.
State Disaster Management Authority chu an chairman, chief minister Lalduhoma hoin Ningani khan an thukhawm a. National Disaster Management Authority member Rita Massal chuan a telpui.
Thutkhawmah hian kum 2021 atanga 2025 thlenga Mizorama khuarel chhiatna avanga thil hlohte chipchiara chhutna (Post-Disaster Needs Assessment) report pek a ni a. PDNA tarlan danin, chhiatna thlentu lian zual chu – Cyclone Remal, African Swine Fever, ruahsur nasa leh leimin nasa, kum 2025-a hmun thenkhata sazu puangte a ni.
Hemi kum chhunga state-in a hloh (total damages) chu cheng vaibelchhe 656.76 nia chhut a ni a, economic loss vbch. 634.35 hu a thlen niin a chhut. Siamthat leh vekna (overall recovery & reconstruction) atan vbch. 879.82 a tul niin a chhut bawk.
Emergency Response Support System kalpui chhunzawm zelna tur, kum 2024- 2025 chhunga district hrang hranga Recovery & Reconstruction Fund atanga hnathawh tur thlan chhuah 178, a vaia cheng vbch. 11.44 senna tur, search & rescue hmanraw lei belhna tur leh ASF State Specific Disaster-a puan zui zel chungchang pawh an sawi a. NDMA member hnenah hian chhiatna lama Mizoram mamawh hrang hrang thlen a ni.
Mizoram sawrkarin Project Management Unit for National Landslide Risk Mitigation Project, National Earthquake Risk Mitigation Project leh Mitigation Scheme for Forest Fire Risk Management a din tawh a. He PMU hi a taka hnathawk thei tura thuam chak chungchang sawi a ni. Mizoram State Disaster Management Plan 2026 leh district 11 te Disaster Management Plan sawifiah a ni bawk.