Kum 5 chhungin fimkhur loh vanga lirthei chetsualna tum 289 a thleng

Kum 5 kalta chhung khan Mizorama lirthei chetsualna thlengah a khalhtu fimkhur tawk loh vanga chesual 289 an awm a, nunna chan phah mi 253 an awm. Hetah hian ruihtheihthil ruih avanga chetsualna leh hemi avanga thi an la tel lo Transport department chhinchhiah danin, kum 2019 – 2023 chhung khan Mizoramah lirthei chetsualna tum 423 a thleng a, nunna chan 355 an awm. Fimkhur loh vang hrim hrima chesual an tam ber a, tarlan tak ang hi a ni. Ruih neih avanga chetsualna thleng tum 85 a awm bawk a, heta nunna chan hi 69 an ni. Wrong side-a tlan avanga chesual 44 awmin, nunna chan phah 28 an awm. Lirthei khalh laia mobile phone hman vanga chetsual phah ta mi 5 an awm bawk a, nunna chan 5 an ni.
Police record-a alan danin, kum 2024 khan road accident 124 awmin a kaihhnawih avanga nunna chan mi 112 an awm. Police record-a lang ve loh pawh a awm thei bawk.
Mizoramah mi nuai 13 vel kan awm a, 2025 January 24 thlenga Transport department-a lirthei nei ziahluh tawh zat chu 399290 vel a ni mek.
Transport secretary Zosangliana chuan mihring leh lirthei population tlem te si, lirthei chetsual avanga nunna chan heti zat kan awm thin hi a lungchhiatthlak hle tih sawiin, lirthei chetsualna thleng thin hi fimkhur deuh se, pumpelh theih tam tak a awm a ring tih a sawi. Lirthei chetsualna thleng thin hi mithiamten an zirchiannaah, zaa 75 chu a khalhtu thiam loh a ni a. A dang zaa 25 chu chhan dang vang a ni, tia sawi a nih thu sawiin, “Lirthei chetsualnaah hian a khalhtu, driver mawhphurhna a lian ber a. Mizorama lirthei khalh thin zawng zawngten kan mawhphurhna pawimawh zia hre thar ang u,” a ti.
Mizoram Road Safety Council thutlukna angin kumin February thla chhung hi Road Safety Month atan puan a ni a. Inrinni khan Transport secretary hian a hawng. Road Safety Month hman tur chu a pawimawh hle tih sawiin, lirthei chetsualna avanga nunna chan kan tlakhniam phah ngei theihnan, thawktu zawng zawng leh mipui, mahni zawnah theihtawp chhuah theuh turin a sawm tih a sawi a ni.
Road Safety Month neih chhung hian Road Safety Council chuan lirthei khalhtute leh lirtheia veivakte kan him zawkna atan kawng hrang hrangin hma lak a tum a. Mipui nawlpui leh a bikin zirlaite tan kawngpuia veivak leh lirtheia khalhtute leh lirtheia chuangte himna turin inzirtir a ni dawn. Lirtheia khalhtute leh lirthei dinhmun pawh a tam thei ang ber endik thin a ni dawn a ni..