Kum 57 Sunday School kai kim

Sunday School kum khat kai kim hi thil ropui a tling a, kum 57 kai kim phei chu a ropui bakah thil mak tak a tling hial ang. Hlimenpa chuan kum 57 a kai kim a, “Pathian hi chawimawi tlak a ni tak zet mai,” a ti.
Mizo Sunday School Union-in Sunday School lawmman an siam danah kum 50 kai kim lawmman a awm a, kum 57 kai kim lawmman a awm lo. Tun Chawlhni, August ni 16 khan kum 50 kai kim lawmman chu a dawng. Mahse a kai kim tak hi chu kum 57 a ni.
Hlimenpa hi Lalngaihzuala a ni a, Hlimena pianga seilian a ni. 1969 atanga 2025 thlengin Hlimen Presbyterian Kohhranah Sunday School hi a kai kim a ni.
Sunday School hi nuamsaa kai kim a ni lo a, dam lo chunga a kai chang te pawh a awm. 1992-ah phei kha chuan ngawr natna (TB) a vei a, chuti chung chuan a kai kim a ni.
“1992-ah khan natnain min bawm ve a, ka TB ve a. Zing, chhun leh zana damdawi ei ngai kha ka ni a. Mahse inkhawm kha ka tum bur mai a ni,” a ti.
Ngaihzuala hian a hrisel that thu a sawi a, “Pathian zarah ka hrisel a, nat chhiat ka nei lo. Khawsik te pawh hi ka hre lo khawp mai a, 1992-a ka dam loh bak kha nat chhiat hi ka nei lo. Hritlang chunga inkhawm chang te chu a awm ve a,” a ti.
A tirah kum 50 te pui pui a suangtuah pha bik lo a, 1969-a a kai kim khan theihtawp a chhuah zui zel a ni ber awm e.
“Putar pakhat, Sunday School inkhawm tha em em mai hi a awm a, a kai kim thin a. Chu chuan keimahah chona a siam a, ‘Putar pawh hetia an kai kim theih chuan thalai te chuan kan thei ve tur a ni,’ ka ti a. Tichuan, ka tum ve ta a, 1969-ah khan ka kai kim ta a ni,” tiin kum 57 chhunga a kai kim vawi khatna chungchang a sawi.
1945-a piang a ni a, 1969 chu kum 24 a tlin kum a ni. Chumi hnuah pawh kai kim a tum ta zel a, “A tam thei ang ber kai kim ka tum ta a, chutiang chuan rilru ka siam a. Mahse kum 50 te hi chu ka ngaihtuah pha lo,” a ti.
1969 hma pawh hian a kai kim tawh thin a, mahse a zawn zata a kai kim hi 1969-ah a intan.
“Sunday School hi ka hlawkpui khawp mai a, Pathian thu hriatna lamah leh finna lamah ka hlawkpui,” a ti a, “Pathian thu zirna sikul hi a tha a ni,” a ti a, hriselna lamah pawh malsawmna a dawn phah nia a hriat thu sawiin, “Heti taka hriselna leh damna lama malsawmna ka dawng pawh hi Sunday School ka kai that vang hi a ni mai awm mang e, ka ti,” a ti. “Hriselna leh damna min petu Pathian hi chawimawi tlak, fak tlak a ni chiang khawp mai,” tiin a sawi chhunzawm a ni.
Sunday School a hlawkpui thu a sawi chhunzawm a, “Kan zirlai hi ka hlawkpui thin a, ngaihnawm ka ti vek mai. Tui deuhvin kan zirlai hi ka ngaithla thin. A sawi lam kan thiam ve lo a, a ngaihthlak lam hi kan tih theih ve a ni a, chuvangin tui deuhvin ka ngaithla a, ka hlawkpui. Kan han zai te hi a nuam ka ti a,” a ti. “Kristian chuan Sunday School a ngai pawimawh turah ka ngai,” a ti bawk.
Chawlhni tuk hi ropui a ti hrim hrim a, “Chawlhni tuk a ni a, hmun hrang hrang atangin inkhawm turin kan han chhuak a, kan han inpel sang sang te hi a nuam alawm, a ropui ka ti thin a,” tiin, Sunday School kai tura phur taka a kal thin thu a sawi.
MSSU-in Sunday School kum 50 kai kimte hi Pi Zaii Medal (Gold) a pe thin a, tun Chawlhni khan Hlimen Presbyterian Kohhran Sunday School-ah Lalngaihzuala hian he medal hi a dawng. Banah a lawm nan kohhranin thingpui ruai a buatsaih bawk a, amah Lalngaihzuala chuan mittui tla chungin thingpui ruai hi a theh.
“A ropui ka ti lutuk a, ka tap lo chauh. Ka mittui ka dang seng ngang lo a, ka insum fan fan a, mahse ka dang seng lo,” a ti.
Sunday School a kai kim tirhah chuan thawhlawmah siki te, dere te an thawh a, tuna fa tleirawl nei tawh nu leh pate pawhin dere hi an hmu hmu lo ang – siki pawh mawle!