Kum kaltaah GST atangin cheng vbch. 970 vel hmu

Sawrkar kum kalta, 2023- 2024 chhung khan Mizoram sawrkarin chhiah chi hrang hrang cheng vaibelchhe 1112 vel a hmu a, heng zinga vbch. 970 chu Goods & Service Tax atanga hmuh a ni.
India rama Goods & Service Tax (GST) hman a nih atanga a kum 7-na champha chu Thawhtanni khan Aizawlah Central GST Commisionerate leh state Taxation department tangdun buatsaihin hman a ni a. Hmanpuitu Taxation minister Dr Vanlalthlana chuan, khawtlang leh ram tihhmasawn nan chhiah tlingkhawm chu tangkai taka hman thin a ni a, chhiah kan pek hian keimahni tan, kan khawtlang leh ram tana hmasawnna hna thawh nana hman a ni tih kan hriatchian a tul tih a sawi.
GST lak kawngah Taxation department-in hma a sawn zel theih nan thawktu indaih lohna phuhru turin bawhzui mek a ni tih a sawi a. Sumdawnna hrang hrang kaltlanga awlsam zawka chhiah chhunluh a nih theih nan hma lak mek a ni tih a sawi bawk.
Taxation hotutute chuan an department-a post ruak engemawzat awm chu hnawhkhah tumin hma lak mek a ni tih an sawi a. Chhiah lakkhawm kawnga sawt zawka hna thawh a nih theih nan district thenkhata an department hmunhma chu changtlung zawka thawmthat tum a ni tih sawi a ni.
2023-2024 chhung a chhiah lakkhawm hi vbch.1112 vel niin, GST kaltlangin vbch. 970 vel lakkhawm a ni a. Chhiah lakkhawm zawng zawng atangin GST atanga dawn hi za zelah 87 vel anga chhut a ni.