Kum tin hmeichhe let hnih thuak mipa thi ziah

2021-ah kum 70 chin chung lam thi hnem ber
Kum 13 kal ta chhunga kum tina Mizorama thihna thlengah, hmeichhia aiin mipa an thi hnem zawk zel a, chawhrualin kum tin hmeichhe let hnih thuak mipa thi ziah ang a ni.
He report hi Mizoram sawrkar hnuaia Registrar of Births and Deaths-in MCCD-2022 (Medical Certification of Causes of Deaths 2022) a tihchhuahah tarlan a ni a. MCCD-ah hian damdawi ina enkawl damlo thi report-te chauh tarlan a ni a. Heng report-te hi sawrkar leh private hospital, UPHC, CHC, PHC leh local RBD, a vaiin institutions 112 atanga dawn a ni.
Hetih lai hian Directorate of Economics & Statistics Mizoram-in Statistical Handook a tihchhuah thar ber (2022)-ah chuan kum 2021-a Mizorama thi zawng zawng zat chu mipa 5156 (63.6%) leh hmeichhia 2945(36.4%) a ni a, kum dangah pawh mipa leh hmeichhia inthlauhna hi a danglam tam ngai lo.
MCCD report-ah hian 2022 leh a hma lam kum 13 chhunga mipa leh hmeichhe thi zat inthlauh dan tarlanah chuan, kum thum chhung- 2015, 2016 leh 2017 kumah te mipa thi zat hi hmeichhe thi zat let hnih aia tam vek a ni a. 2015 khan mipa thi zat 1871 (67.3%) a nih laiin hmeichhe thi zat chu 908 (32.7%) a ni a; 2016-ah mipa 1824 (67.4%), hmeichhia 880(32.6%); 2017-ah mipa 2062(68%), hmeichhia 972 (32%) a ni. Hmeichhia thi zat tam ber kum chu 2019 kha niin 38.3% a tling.
Thih chhan tam ber chu pum lam -Digestive system (18%) a ni a, thisen kawng Circulatory System (16%)-in a dawt a, Thawkna Chuap leh a kaihhnawih Respiratory System (15%), Parasitic Diseases (10%) leh Cancer lam Neoplasms (9%) te a ni bawk. Heng thih chhan lian zual chi hrang hrang panga tarlante hi kum 2021 aiin a sang zawk vek bawk a ni.
Directorate of Economics & Statistics-in a tihchhuah thar ber Statistical Handook -2022 ah chuan, kum 2021 khan Mizoramah mitthi 8101 awmin, kum 70 leh a chunglam thi an tam ber a, thi zat 8101 atanga 32.87% (2663, mipa-1487, hmeichhia-1178) an tling. A dawttu chu kum 55-64 inkar niin 14.43% (mipa 797, hmeichhia 372) a ni a; a pathumna hauhtu chu kum 35-44 inkar niin thi zat chu 13.5% (mipa 820, hmeichhia 274) a ni a, A palinaah kum 45-54 inkar 12.98% niin mipa 743, hmeichhia 309) an ni.