Kumin hian India state pakua lai an inthlang dawn a. A hmasa berah Tripura chuan February 16 hian Assembly inthlanna an nei ang a, February 27 ah Meghalaya leh Nagaland an inthlang leh zui bawk ang a, March 2-ah vote chhiar a ni ang a. Election Commission chuan kumina inthlang tur Mizoram inthlan hun a la puang lo thung.
Northeast state bakah hian Karnataka, Madhya Pradesh, Rajasthan, Chhattisgarh leh Telangana te pawh kuminah an inthlang dawn a, kumin inthlan te hi kum 2024 inthlanpui hmaa semi-final anga ngaih a ni.
-- Advertisement --
Northeast-a bukhuar nasa Bharatiya Janata Party te chu poll mode in an awm reng tawh a. Tun hnai lawka New Delhi a national executive meet neihnaah pawh party president J.P. Nadda chuan kumin State pakuaa inthlan chu nakum Lok Sabha inthlan hisapin a pawimawh thu sawiin party workers te chu BJP tena hnehna an chan ngei theih nana hmala turin a tur nghe nghe a ni.
Tripura: BJP te sorkar leh ang em?
Kum 2018 khan Tripura-ah kum sawmhnih chuang Left Front sorkar chu paihthlain BJP ten sorkar an siam a. Saffron party te hian Indigenous People’s Front of Tripura (IPFT) te nen thawkho in House member 60 awmnaah two-third majority an nei a, BJP ten seat 35 lai la in, kuminah erawh thuang li laia inbeihna a awm tura ngaih a ni.
BJP ten sorkar lei ngei an tum laiin CPI(M) te chu Congress te nen an tangrual dawn a, hei hian state politics a kuai her dah thei tura ngaih a ni a, a chhan chu BJP te len hmaa inhmelma kumhlun party an ni a, an thawkho dawn ta si a ni.
An tum ber chu BJP te hneh niin, “Mipui ten BJP rorelna tihtawp an duh a, mipu duhdan kan zah a, tanrual kan remti a ni. Seat kan chan dan tur a pawimawh lo, BJP te hneh chu agenda ber a ni” tiin CPI(M) State Secretary Jitendra Choudhury chuan a sawi.
BJP chuan an chak phah zawk turah ngaiin, “A hma pawhin an inhnim hnai tawh a, tunah an pholang ta a. CPI(M) te hian kum 25 lai Congress nena inhriatthiam rukna vangin ro an lo rel tawh” tiin BJP State President Rajib Bhattacharjee chuan a sawi a.
Congress leh CPI(M) te thawhdunna hi BJP te chuan an la thutak hle thung. Tun hnaiah party chhungah buaina an nei a, nikumah BJP leader Bipblab Kumar Deb chu Manik Saha an a thlak a, an alliance chu MLA pasarihin an chhuahsan bawk a. Chung mite chuan Tipraha Indigenous Progressive Regional Alliance, or TIPRA Motha, tribal constituency thunun tura ngaihte chu an zawm. TIPRA te hi Tripur royal scion leh Congress leader hlui Pradyot Debbarma kaihhruai te niin indigenous community te tana State hran ngiat an ni a, tribal te awmnaah MLA seat sawm hnih lai a awm bawk si a ni.
Kum 2021- a Tripura Tribal Areas Autonomous District Council (TTAADC) inthlanah khan TIPRA te chuan seat 28 awmah seat 18 lawih an la a, hei hi BJP te tan chuan ralkhel dar a ni. Motha te chuan inthlanah seat 45-50 inkar vel an chuhu tur thu an sawi a, political party tin Greater Tipraland thlawp tute nen an inkawp theih thu an sawi bawk.
Hetih lai hian Trinamool Congress (TMC) te chuan Mamata Banerjee hnuaiah West Bengal pawn lam thlenga insawhngheh tumna an kalpui zel a. Tripura-ah pawh thawhpui theih awm party an zawng bawk a. Kum 2021 a Tripura a urban body election ah khan vote share 16.39 per cent lai an hmu a, hei hi an lar chakzia lanna pawh nia ngaih a ni.
Nagaland: Naga political issue in inthlan hliahkhuh
BJP leh Nationalist Democratic Progressive Party (NDPP) te chuan kum 2023 inthlanah thawhho leh an tum a, kum 2018 pawh khan an thawk dun tawh a. Chakna changin MLA 30 neiin party tenau zawk te nen sorkar an siam a.
Kumin inthlanah NDPP ten seat 40 an chuh ang a, BJP ten seat 20 an chuh thung ang a. Kumin inthlan hi Naga peace talks boruak hnuaiah neih leh a ni dawn.
Eastern Nagaland Peoples’ Organisation (ENPO) te chuan inthlan an boycott tur thu an puang a, State hran an ngiat a ni. ENPO ah hian Naga tribe hrang hrang district 16 a inzarpharh te chuan kum tam hnuchhawn laka him nan tiin Frontier Nagaland state an phut a ni. District paruk- Kiphire, Longleng, Mon, Noklak, Shamator leh Tuensang lai niin MLA seat 20 lai awmna a ni.
MLA pali lai nei Naga People’s Front (NPF) te chuan an party ngaih pawimawh ber chu Naga political issue chinfel a ni an ti a. Chief Minister Neiphiu Rio chua he issue hi ‘right-thinking’ person tena rules zawma an bawhzui a ngai a, sorkar chuan State ah constitutional crisis a awm a remti thei lo a ti thung.
Meghalaya: NPP a malin kal dawn
Kum 2018 khan National People’s Party (NPP) te chuan Meghalaya Democratic Alliance chu United Democratic Party (UDP) leh BJP te nen sorkar thei khawpa chak an awm loh hnuah an din a. Khata tang khan Party thlaka MLA nihna bansan MLA 18 ana wm tawh a, tuna Meghalaya Assembly ah MLA 42 chauh an awm.
Coalition boruak a tha lo va NPP leh BJP te inlaichinna chu BJP leader Bernanrd N. Marak chu a farmhouse nawhchizawrhna hmunah a chhuah tia man a nih vangin a chhe zual a, BJP te chuan NPP te chu eirukna nasa tak kalpui tiin an puh bawk.
Party pahnih ten tun thlengin inthlanah thawhho tumna an nei lo va. NPP te chuan Member 60 awmna Assembly ah canddiate 58 an puang der tawh a, UDP pawh a malin inthlan an hmachhawn dawn bawk.
Trinamool Congress chu thawklehkhatah CM hlui Mukul Sangma leh Congress MLA 11 tena an zawm avangin Opposition lian an ni nghal der thei a. TMC te hian Assembly seat 24 awmna Garo Hills region chu beihpui thlak nan ber an hmang bawk.
Mizoram sorkar lai mek hun hi December 17 a tawp tur niin kum tawp lamah inthlann huaihawt a ni dawn a, a hun tur erawh Election Commission in a la puan chian tur a ni.
Mizoram-ah BJP ten MLA pakhat an nei a, an vote share pawh 8% lawih a ni tawh a, kum 2013 kha chuan BJP te vote share chu 0.37 per cent chauh a ni a, hma an sawn chak hle. Nikuma Mara Autonomous District Council (MADC) polls ah seat 12 lai lain party mala seat la hnem ber an ni.