Kuminah heroin man a pung

Mizoramah heroin a hluar a, a hluarzia hi khawlaiah pawh a lang thei. A heroin-a a pun rual hian a man pawh a pung ve a nih hmel.
Eichawp thilte anga a man hi nghet tura beisei chi a ni lo a, thla hnih khat lekah pawh a man hi a che a che thin. Kumin hian a tam em em chungin a man hi nikum nena khaikhinin a pung tho nia hriat a ni.
A ti thin leh a zuarte’n an tehna tlanglawn pakhat chu ‘chhin sen khat’ tih a ni a, tunlai hian Aizawlah chhin sen khat hi Rs 600 man te a ni.
A ti thinte sawi danin, nikum lamah kha chuan chhin sen khat hi Rs 500 man vel a ni tlangpui a, kumin hian Rs 600 man vel a ni tlangpui.
‘Tic tac bur’ a awm leh a, chhin sen ruk leh tic tac khat hi a inzat velah ngaih a ni. A ti thinte sawi danin, tic tac khat hi tunlaiin Aizawlah Rs 2000 chuangin an lei thin a, Rs 2300 a kai chang te pawh a awm. Chutih rual chuan thenkhat chuan Rs 2000 a tlin loh chang a awm thu an sawi a, Rs 1800 atanga Rs 2300 vel a ni tlangpui ang an ti. Nikum kha chuan Rs 2000 man vel a ni tlangpui an ti bawk.
Heroin hi khawlaiah an zuar mai thin a, chu chu ‘vawrh’ an ti. Khawlaiah a lei mai theih a, lei hi a har lo. An sawi danin, zing lam leh zan lamah lei hi a rem ber a, chhunah chuan a vawrhtute hi an tawm ve deuh.
A hlawma zuar leh a tawlhte chuan ‘hawng’-in an teh ber a, tunlai hian hawng khat hi Rs 30000 man vel a ni an ti.
Heroin hi a hluar a, Aizawl khawlaiah heroin zawng leh a vawrh an insul pel a, kawng sira lo khawih an awm thin bawk. Mizoram Excise & Narcotics Department hotute chuan khaw dang atanga Aizawla kal, heroin khawiha khawlai vela tal mai mai, thlen in pawh nei mumal lo an awm teuh tih an sawi.