Kuminah heroin man hnem leh tawh

Kuminah heroin man hnem leh tawh
Mizoramah ruihhlo a hluar mek a, heroin a tam hle. A mantu lamin an man mawlh mawlh a ni ber a, man loh engemaw zat a awm turah ngaih a ni bawk. Kuminah excise force te’n heroin hi an man hnem leh tawh hle.
Mizoram Excise & Narcotics (MEN) department chhinchhiahnaa a lan danin, 2018-ah khan heroin hi kg 8.716 an man a, hei hi kum khat chhunga kg 8 an man tlin vawi khatna a ni. Kuminah thla thum chhungin chu aia tam chu an man tawh.
MEN department hian kuminah March thla thleng khan heroin hi kg 9.754 an man tawh a, hei hian 2020 kum tluana an man zat a pha thuak. 2020-ah khan heroin hi a hluar tia sawi a ni tawh a, khami kumah khan kg 11.710 an man.
MEN hotute chuan heroin hluar dan hi a kal mar pat rih nia an ngaih thu an sawi a, khawchhak lam atangin a rawn lut nasa tih an sawi.
Heroin hi 2014 velah pawh a hluar tawh a, Covid-19 hrilen hnuah a hluar ta zel niin an sawi a, 2022 velah khan, Myanmar an buai hnuah Myanmar-a cheng, a hmaa ruihhlo zawrh leh tawlh lama inhmang lem lo, inhmang ta an awm thar teuh nia sawiin, Mizoram rawn luhpui an manah pawh mi thar, tun hmaa hetiang lama inhmang lo an tam thu an sawi.
Mizoramah heroin a hluar a, mahse heroin ti thar an pung hluai tihna a ni chuang lo tih an sawi a, Mizorama heroin an manah hian Mizoram pawna ken tur a tam tih an sawi.
Tunlaiin Aizawl khawpuiah heroin hi a hluar a, hmun lun laiah pawh heroin hnuhma hmuh tur a awm fo; Vanapa Hall bul velah phei chuan chhun pachangah pawh inchiu lai hmuh tur a awm thin.