Kuminah heroin man hnem leh tawh

Heroin a hluar a, a kal mar hle niin a lang. Kuminah an man hnem leh tawh a, thla khat lekah heroin tam zet mai an man leh tawh
Mizoram Excise and Narcotics (MEN) department-in thla liam ta January-ah khan heroin hi kg 7.350 an man a, thla khat chhung maia manah chuan tam tak a ni.
2017 thleng kha chuan MEN department hian kum khat chhungin heroin hi kg 7 an man tling ngai lo a, kuminah chuan thla khat chhungin kg 7 an man tling der tawh.
Heroin hi 2015-ah khan kg 4.088 an man a, hei hi kum khat chhunga kg 4 an man tlin vawi khatna a ni. 2017-ah kg 6.186 an man a, 2018-ah kg 8.716 an man; 2018 hi kum khat chhunga kg 8 an man tlin vawi khatna a ni.
2013 leh 2014 velah heroin hi a hluar tia sawi a ni tawh a, 2015-a kg 4 an man tlin hian a hun lai chuan mak tih tham a ni. Chumi hnuah a hluar ta zel a, 2019 atang chuan kg 10 an man tling ta zel.
2019-ah kg 12.596 an man a, kg 10 an man tlin vawi khatna a ni. 2020-ah a hma kum aiin an man tlem a, kg 11.710 an man. 2021-ah kg 18.906 a tling ta dawrh a, 2022-ah kg 33.418 lawih an man. 2023-ah phei chuan kg 79.359 lai mai an man a, hei hi an man tam ber kum a ni.
Kum a thar a, heroin hi a hluar zel niin a lang. Heroin man thu hriat tur a awm fo a, tam thama man a awm fo bawk.