Kuminah kuhva tawlhruk
Vbch. 31+ hu man tawh
Mizoram Police chuan kumiah dan loa kuhva rah tawlhruk cheng vaibelchhe 31.27 chuang hu an man tawh a, he thila inhnamhnawih mi 61 man an ni tawh bawk.
Mizoram Police chhinchhiah danin, kumin January 1 atanga April 10 thleng khan Mizoram chhungah dan loa kuhva rah tawlhruk bag 7435 (kg. 544030) an man tawh a, hei hi an hralh thinna anga chhutin Rs. 31,72,70,600 hu a ni. Heng kuhva rah ro man kaihhnawihah hian 188 IPC hnuaiah thubuai 19 ziahluh tawh niin, mi 61 man an ni tawh.
Dan loa kuhva rah tawlhruk hi kan zavaia do a ngai tih Mizoram Police hotute chuan sawiin, kuhva rah tawlhruk hi a bikin India, Myanmar leh inter state ramri hrul vela thil buaipuiawm leh ngaihtuahawm tak a ni zel tih an sawi. Kuhva rah tawlhruk an donaah theihtawp chhuah zelin, state chhung hmun hrang hrangah dan loa kuhva rah phurh tam tham tak an man tawh a, an man mek zel tih an sawi a ni.
‘Dan loa kuhva rah phurh titawp vek tur hian Mizoram Police chuan theihtawp kan chhuah zel dawn a, dan bawhchhiatna chi hrang hrang dona kawnga kan beihpui thlaknaah hian mipui thlawpna kan ngen nawn a ni. Hetianga dan loa kuhva rah phur hria chuan mahni kuta dan kenkawh tum mai loa, police leh thuneitute hrilhre thuai thin turin mipui kan ngen thar a ni,’ an ti.
Hetihlai hian April 13 zan khan Khawzawl Police chuan kuhva ro bag 65 (kg. 5200) chu 407 truck pakhat, Lallianmawia (37), Kanan Veng Champhai district nia inchhal khalh atangin Tualpui Junction-ah an man a. Hemi zan vek hian Sairang Dinthar khawtlang hruaitute hnen atanga thudawn bawhzuiin Sairang Police chuan kuhva ro bag 90 (kg. 7200) chu truck pakhat, B. Lalsawmliana (34), New Champhai nia inchhal khalh atangin an man bawk. An thil man hi dan anga hma lak turin Customs Department hnenah hlan a ni.
-- Advertisement --
2023 January 1 atanga April 10 thlenga dan loa tawlhruk kuhva rah man
District Man Zat A hlutna (Rs)
Aizawl bag 2321 (kg. 185680) 27,63,60,000
Champhai bag 1186 (kg. 64520) 57,13,600
Khawzawl bag 1033 (kg. 81040) 1,86,39,200
Saitual bag 596 (kg. 43660) 30,68,800
Serchhip bag 622 (kg. 40670) 22,97,500
Hnahthial bag 426 (kg. 33480) 3,38,100
Kolasib bag 1251 (kg. 94980) 1,08,53,400