Kuminah Saitual Police-in ruihhlo kaihhnawihah mi 83 an man tawh

Tun thla 8 chhung khan Saitual District Executive Force chuan ruihhlo chi hrang hrang kg. 400 chuang an hman tawh a, he thila inhnamhnawih an man chu mi 83 an ni.
District Level Narco Co-ordination Committee (NCORD) chu an chairperson, bawrhsap Srinivas Sadi kaihhruaiin Thawhtanni khan an thukhawm a. Thutkhawm hnuhnung ber leh tun inkara report-a a lan danin, Saitual Police-in heroin kg. 3.341, methamphetamine kg. 72.514 leh ganja kg. 18.520 an man a, he thila inhnamhnawih mi 15 leh lirthei 6 man tel a ni.
Kum 2026 chhung hian Saitual DEF-in ruihhlo an man hi kg. 406.001 a tling tawh a, he thila inhnamhnawih mi 83 leh a phurhna atana hman lirthei 40 an man tawh.
NCORD meeting hnuhnung ber leh tun ami inkarah hian Excise & Narcotics-in heroin gram 0.83 manin, ganja kung 70 an tichhia a. Ruihhlo ngai enkawlna TBCC leh TNT-a enkawl turin mi 6 an thawn. Sub Hqrs YMA Saitual chuan heroin, tictac bur 18.5, Sting burte khatlo deuh, chhinsen 48, hajmola bur 2 an man a; heng thila inhnamhnawih mi 14 man niin, mi 7 chu home-ah dah an ni. Heng bakah hian an huamchhung YMA Branch hrang hrangah tleirawl/ rawlthar hnenah ruihhlo laka him turin an zirtir thin a ni.
Special Investigation Branch report atangin kumin August chhung khan 34 Assam Rifles-in Ngopa Police leh SIB Ngopa ten thu an pek angin operation vawi hnih an nei a, heroin kg 1.612 an man.
District Child Protection Unit report atangin, August chhungin JJB leh Helpline No. 1098-ah naupang ruihhlo ti thubuai thar ziahluh a awm loa, special drive – Children in Street Situation (CISS) chu August 28-ah Saitual khawpui chhung hmun hrang hrangah neih a ni. Group thumah inthenin, group tinah police pakhat zel an tel a, Hotspot 10-ah kalkualin an endik a, thubuai thar hmuhchhuah a awm lo.
District Education Office hmalaknain Saitual town chhunga school 9 thlanchhuah hnenah ruihhlo leh a kaihhnawih that loh zia inzirtir a ni bawk.