Kuminah Serchhip district-in TB awm lohnaah inpuan tum

Kuminah Serchhip district-in
TB awm lohnaah inpuan tum
TB natna tih bo tuma beihpui thlakna bawhzuinaah Serchhip district chuan kumin chhungin TB awm lohna district-a inpuan hman an tum. District TB Forum Serchhip chu an chairman, bawrhsap Paul L Khuma hoin Thawhlehni khan an thukhawm a. 2024 December 9 atanga ‘100 Days TB Campaign’ an kalpui dan thlirlet niin, he hmalakna hi Mizoram-a district 4-ah kalpui mek a ni a; kumin-a World TB Day – March 24 thlengin kalpui a ni dawn. Mi inphalte tanpuina atanga TB vei damloten chawtha an dawn theihna tur, ‘Nikshay Mitra’ hnuaiah Serchhip district-ah mi pahnihin tanpuina an dawng mek.
‘TB Free Village’ kalpui mekah kum 2023-ah Serchhip district-a khua 11 leh kum 2024-ah khua 35 chu TB Free Village-a puan an ni tawh a. Kumin World TB Day-ah khua zawng zawng TB Free Village-a puan hman beisei a ni tih sawi a ni.
Thutkhawma tarlan danin, kum 2024 khan Serchhip district-ah TB vei mi 69 hmuhchhuah niin, December thleng khan mi 37 enkawl dam an ni tawh a, TB damdawi ei lai mi 32 awmin MDR TB vei mi pahnih an awm mek.