Kumtling lote himna tur rel

Sawrkar dan kalha naupang kumtlinglo hruai/ hruai bo tihtawp leh ven dan tur sawiin Khawzawlah hemi Committee chairman, district bawrhsap K Lalrohlua hoin Thawhlehni khan thutkhawm a ni.
Khawzawl District Child Protection officer Lalsiammawii chuan Mizorama naupang hruai bo case hrang hrang awm tawhte a sawi fiah a. Thiamthil bik neilo tan ram pawnah sum tam tak hlawh ngawt a theih loh tih mitinin an hriat a tul tih a sawi.
Khawzawl SP Lalchhuanthanga sawi danin, Mizoram Police hnuaiah district tinah Anti-Human Trafficking Unit din a ni a; mihring hmanga sumdawnna kaihhnawih chu SP CID (Crime) hnuaia chhui thin a ni. Khawzawl Police Station-ah Child Friendly Room leh Women Help Desk dah a ni tawh.
Khawzawl District Child Welfare Committee chairman PC Rosiama chuan ramdanga hnathawh tumte chu agency rintlak kaltlanga kal hram hram tura inzirtir a tul thu leh high school leh higher secondary school-ah zirtirna kalpui thaa a hriat thu a sawi a ni.
Khawzawl SP hnuaia Anti-Human Trafficking Unit chu chak zawka kalpui tha an ti a. District Child Protection Office-in high school leh higher secondary school-ah human trafficking kaihhnawih inzirtirna kalpuina tur ‘handout’ siam se, zirtirna hi elementary school-ah pawh kalpui tum nise an ti. Public transport – maxi cab, taxi adt chu an mi phurhteah helam kaihhnawih rinhlelhawm an awm a nih chuan thuneitute hnena thlen thuai tura ngen an ni bawk.