Mizoramah heroin a hluar nasa a, kumin hi heroin man tam ber kum a nihna a rei tawh; kum chanve velah heroin man tam kum a ni tawh a, an la man belh zel bawk.Mizoram Excise & Narcotics (MEN) department-in kuminah August thla thleng khan heroin hi kg 67.010 an man tawh a, kum dang kum tluana an man zat a khum hneh tawh hle.
July thla thleng khan kg 52.854 an man a, July thla a liam khan 2023 hi MEN department-in heroin an man hnem ber kum a ni tawh. August thlaah kg 14.156 an man belh leh a, heroin man tam ber kuma an man zat hian kum dang a khum nasa tawh.
A hma chuan 2022 khan an man tam ber kum a ni thin a, kg 33.418 an man. Kg 33.418 kha mak tih tham tling a, chu aia tam chu kuminah kum chanve velah an man hman. 2015-ah khan kg 4.088 an man a, kha kha kum khat chhunga kg 4.088 an man vawi khatna a ni. Tunah chuan kg 4 te hi chu tum khatah an man fo.
Kuminah heroin an man hnem a, mahse MEN department hotute chuan tun hnai chawlhkar hnih khat velah hian a hma angin an man nasa lo tih an sawi. Hetianga a tlakhniam deuh chang hi a awm ve bawk tih an sawi a ni.
Tunlaia heroin hluar dan hi, Mizorama heroin ti an pun vang emaw heroin mamawhna a san thut vang emaw niin an hre lo a, Mizoram pawna hralh tur, Mizoram paltlangpui tur a tam vang niin an hria.
Heroin tam tham an man hi Mizoram pawna mi tur a ni deuh zel a, heroin vanga an manah hnam dang an thahnem bawk. Manipur buai hnuah, Manipur paltlanga hmun danga zawrh tur kha Mizoram paltlangpui an tum ta nia a lan thu an sawi bawk.
Heroin man tam kumah heroin man belh zel
Get real time updates directly on you device, subscribe now.