Ladakh: A eng uar dawn

India ram mai pawh ni lo, khawvel huap pawha hmun mawi leh khualzinte tlawh nasatna, Ladakh chuan tlawh chhan tur dang a neih belh leh dawn a ang hle a. Khawvela single-location solar photo-voltaic plant lian ber a nei leh dawn.
Jammu & Kashmir-a Kargil chhim lam km 200 emaw chauhva hla, khuarel mawi tak, tlang inkham mawi tak tak awmna, Ladakh-ah hian project lian tham tak mai kalpui turin inbuatsaihna a kal mek a. Hei hi peih a nih hnuah chuan he lai phai hi a eng uar thei lehzual ang a, kum tin carbon emission tonne 12,750 zet chhuak thin chu a awm tawh lo vang a. Diesel hmang khawl an mamawh tawh lo vang a, power dang nei miah lo pawhin thla 6-8 vel daih power an khawl thei tawh ang.
Renewable energy ministry hnuaia SECI (Solar Energy Corporation of India) chuan J&K ssorkar nena intum tawm turin, 5,000 MW (mega watt) zet pe chhuak thei tur, Ladakh unit din turin project an nei a. Kargil-ah pawh 2,500 MW pe chhuak thei tur solar plant din tum a ni a, heng project pahnih hi kum 2023-ah, Rs Vbc 45,000 senga zawh hman tum a ni.
Ladakh project bik hi Nyoma-a Hanle-Khaldo-ah din a ni dawn a, hei hi Leh atanga km 254-a hla a ni a. Kargil project hi Zanskar-a Suru-ah din turin niin district khawpui atanga km 200-a hla a ni a. Ladakh project-in power a pek chhuahte hi Kaithal, Haryana-ah pawh thlun chhuah a ni dawn a, km 900 zeta thui line phumin Leh-Manali road a zawh dawn a. Kargil project hi Srinagar bul-a New Wanpoh nen thlunzawm a ni ang.
SECI director (power systems) SK Mishra chuan, “Tunah hian harsatna kan nei deuh va, a leilung awm dan hian a zir loh deuh avangin tender kan chhuah tawhtah harsatna a awm deuh,” tiin a sawi.
Hetih lai hian Leh leh Kargil-a thuneitute chuan ram acre 25,000 leh 12,500-a zau hman tur, awl tha tak an nei tawh a. Hei bakah hian ram hawh tur, hectare 1 zel kum khat atan Rs 1,200-a hawha kum tin a man 3%-a pun phal an awm bawk.