LADC-ah MNF leh Congress thawkdunin sawrkar siam tum

Lai Autonomous District Council-ah thla hnih dawn sawrkar a kal mumal loh hnu ah member (MDC) pakhat nei Indian National Congress leh member 12 nei Mizo National Front chuan United Legislature Party dinin sawrkar an siam theih thu larsap hnenah an thlen.
Lai ADC-ah hian V Zirsanga kaihhruai MNF Legislature Party chuan sawrkar a siam reng hnu ah, thlawptu a ngah tawk tawh lo, tiin, Lairam Democratic Alliance invuah MDC 13 chuan larsap hnenah an thlen a; kumin March 7 khan larsap chuan LADC ah CEM nilaiin thlawptu a neih dan fiah a tul, tiin, floor test nei turin a ti a. Floor test neih tum ni hian Session tan hma in CEM nilai V Zirsanga hian CEM atanga banna a thehlut a, sawrkarna siam zui thei mai an awm ta chuang lo a ni.
Hei vang hian larsap chuan LADC thuneihna laksakin enkawl lailawk turin Lawngtlai district bawrhsap chu kumin March 15 khan a ruat a. Caretaker-in thla khat leh a chanve a enkawl hnu ah May 1 chawhma khan INC member 1 leh MNF member 12 te chuan LADC ah INC member C Lalmuanthanga kaihhruaina hnuaiah sawrkarna an siam theih thu hi larsap hnenah caretaker, Lawngtlai bawrhsap Cheemala Siva Gopal Reddy kaltlangin an thlen a ni.
Caretaker hian a hnena an thu thlen hi larsap hnenah a thlen nghal tur thu a lo hrilh a; United Legislature Party hian LADC chairman VL Hmuaka pawh hmuin sawrkar an siam theih thu an thehlut a. Lawngtlai West MLA C Ngunlianchunga leh MLA hlui H Biakzaua ten tawiawmin, LADC-ah sawrkar a piang mai thei lo chu Council mipuiin an tawrh nasat avangin MNF leh Congress chuan mipui tawrhna thleng zel tur ngaingam loin sawrkar siam dun an remti tih an sawi a ni.
Lai Autonomous District Council-ah hian elected member 25 an awm a. Lawngtlai Chandmari bialtu MDC Dr Lorrain Lalpekliana Chinzah chu MLA inthlanpuiah Lawngtlai East bial atangin ZPM ticket-in MLA-a thlantlin a nih hnu ah, a MDC bial hi a chhuahsan a, tunah chuan elected member 24 an awm mek.
Kumin April 8 khan MNF MDC 7 ten MNF party an chhuahsan a, heng MDC 7 leh MDC pakhat ve ve nei BJP leh ZPM bakah independent member 2, an vaiin member 11 chuan Lairam Democratic Alliance siamin, tunah United Legislature Party hian member 13 a nei ve thung a ni.
United Legislature Party hian hruaitu atan leader-ah C Lalmuanthanga, deputy leader – Sanghuliana Mualchin, secretary – H Lalmuansanga, treasurer – Lalropuia Chinzah te an thlang.