Lai Autonomous District Council-ah sawrkar nghet tak a din leh thuai theih nan MNF party chuan plan A, B leh C an nei a, hma an la mek tih MNF adviser Robert Romawia Royte chuan a sawi.
Thawhtanni khan MNF District Hqrs Lawngtlai inkhawm a hmanpuinaah Robert Romawia chuan, LADC sawrkar suspend ngaia a awm chu pawi a ti a; sawrkar nghet tak a din leh thuai theihnan MNF chuan Plan A,B,C thlengin a nei tih a sawi. MDC 24 awmnaah MNF-in MDC 19 nei mah se, MDC-te thawhho theih loh avangin LADC sawrkar suspend a ni a, MNF Gen Hqrs chuan MNF MDC zawng zawng zaikhata luang turin a duhin a beisei a, chu chu Lairam mipuiin MDC an vote tlin chhan pawh a ni tih a sawi.
“Lai hnam leh LADC zahawm nan MNF party chuan hma a la mek a, mipui rintlak sawrkar tha a pian thuai beisei ang,” a ti.
MLA Robert Romawia Royte chuan April 19-a Lok Sabha MP inthlanah Parliament House chhung leh pawna tribal ho, minorities leh Kristiante huai taka tan tlat ngamtu Pu K Vanlalvena chu Mizoram aiawh MP atan a tha ber a, party party sawi loin mipui MP ni turin vote turin mitin a sawm tih a sawi. “MP atana enchhin chawp ngai tawh lo, a tha tih hriat sa a ni,” a ti.
Myanmar nena inkalpawh phalna (FMR) central sawrkarin a hlih, Myanmar ramri hung, Uniform Civil Code leh Kristian nekchepna thleng mekah Mizoramin MP chak leh huaisen a mamawh tih sawiin, Pu K Vanlalvena a tlin chuan hmarchhaka political party lian – NPP (Meghalaya), NDPP leh NPF (Nagaland), AGP(Assam) te nen huai takin hnam leh sakhua tana tha loah inthurualin an do dawn a, chumi atan chuan MP candidate dangte aia tling ngei tura mipui beisei K Vanlalvena vote chu a fuh ber tih a sawi a ni.
LADC-ah sawrkar nghet din theihnan plan kan nei – Robert Romawia
Get real time updates directly on you device, subscribe now.
Prev Post