LADC session-ah ZPM member chhuak

Lai Autonomous District Council Emergency Session neih mek chu Nilaini khan a nithumna a ni a. LADC Session Hall Lawngtlaiah deputy chairman tur thlan niin, Tuithumhnar bialtu MDC H Lalmuansanga chu thlan a ni. Deputy chairman thlan dawn hian ZPM member-ten House an chhuahsan.
LADC-a deputy chairman CL Lianzuala chuan Thawhtanni khan chairman hnenah banna a thehlut a. Amah hi tunhnaia MDC dang 8 nena ZPM zawmtu zingah telin, tuna Congress leh MNF sawrkar intawmah deputy chairman nih zui chu thiltih awm nia a ngaih loh avangin Thawhlehni chawhnu dar 3.00 khan chairman hnenah banna a thehlut a ni.
Eptu member-te berin vote thlak loa House an chhuahsan avangin chairman VL Hmuaka chuan chuhtu dang awm loin deputy chairman tan H Lalmuansanga thlan a nih thu a puang a ni.
Thudawn danin, deputy chairman thlan dawn hian eptu lam, ZPM member-te chuan deputy chairman thlan tum danah thil felhlel a awm nia an hriat avangin House hi an chhuahsan a ni.
LADC-a opposition leader K Hre Kung chuan Lawngtlaia thuthar thehdarhtute a hrilh danin, deputy chairman thlan tur hian hriattirna chhuah leh inthlan hun inkarah ni hnih tal a tla tur a ni, tih dan dinglai a awm laiin, hmanhmawh leh chawpchilh takin, lehkha pawh eptu member-ten an hmuh kim hma in deputy chairman thlan a ni chu LADC dan palzutna ni ah ngaiin, House an chhuahsan tih a sawi. Eptu hruaitu a nih angin Thawhlehni pawh khan chairman hnenah deputy chairman thlan hun chu dan bawhchhe lo zawnga kalpui tura a lo ngen tawh thu leh zawm erawh a hlawh tak loh thu a sawi bawk.