Lady Gaga leh Bruno Mars ‘Die With a Smile’ a lar ber

Lady Gaga leh Bruno Mars ‘Die With a Smile’ a lar ber
Lady Gaga leh Bruno Mars hla thar ‘Die With a Smile’ chu Billboard Global 200 chart-ah a No.1 a, he chart-a kar thum a No.1-na a ni ta. Hetihrual hian Linkin Park comeback single ‘The Emptiness Machine’ pawh No.3-ah a debut a, he chart-a an thlen sân ber a la ni a, Sabrina Carpenter pawhin chart top 10-ah hla pathum a nei bawk e.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian khawvel ram hrang hrang 200 chuanga official-only stream (subscription leh ad-supported audio leh video music services) leh download sales te chu tehna pawimawh a ni.
‘Die With a Smile’ hian stream maktaduai 111.4 leh sales 9,000 a la nei thei a, hei hi chart-ah a kar thum nan a No.1 pui leh ta a ni. He hla hi August ni 16-a an tlangzarh kha niin, Lady Gaga leh Bruno Mars tan he chart-a an hla No.1 kai thei hmasa ber a ni bawk.
Chart-a kar thum No.1 thei, Billie Eilish ‘Birds of a Feather’ chu No.3 atangin No.2 a kai thar leh a, he hla hi August thla tir atanga chart No.1 kaiin, kar thum chhun a zawnin a No.1 thei a ni.
Linkin Park hla thar ‘The Emptiness Machine’-in stream maktaduai 74 leh sales 19,000 neiin, No.3-ah a debut a, he chart-a an hla top 10 kai thei hmasa ber a ni. He hla hi a studio album pariatna, November ni 15-a an tlangzarh tur ‘From Zero’ atanga an lead single a ni. He hla hi 2017-a an co-frontman Chester Bennington thih hnua Linkin Park hla thar an tihchhuah leh hmasak ber a ni a, an vocalist thar Emily Strong hoa an hla tihchhuah hmasak ber a ni bawk.
Sabrina Carpenter-i’n chart top 10-ah hla pathum neiin, ‘Taste’ chu No.2 atangin No.4-ah a tawlh a, he chart-a kar thum No.1 thei ‘Espresso’ chu No.4 atangin No.5-ah a tawlh a, kar hnih No.1 thei ‘Please Please Please’ chu No.5 atangin No.6-ah a tawlh ta bawk.
Billboard Global 200 Top 10:
1 Die With A Smile – Lady Gaga & Bruno Mars
2 Birds Of A Feather – Billie Eilish
3 The Emptiness Machine – Linkin Park
4 Taste – Sabrina Carpenter
5 Espresso – Sabrina Carpenter
6 Please Please Please – Sabrina Carpenter
7 Si Antes Te Hubiera Conocido – Karol G
8 A Bar Song (Tipsy) – Shaboozey
9 Good Luck, Babe! – Chappell Roan
10 Beautiful Things – Benson Boone