Thawhleh zing khan NBA play-off game lina khelh chhunzawm a ni a, Los Angeles Lakers chuan Memphis Grizzlies hneh nawn lehin semi-final an hnaih leh zual. Inkhel dangah Miami Heat chuan Milwaukee Bucks an hneh nawn leh bawk.
Play-off game linaah hian LA Lakers leh Grizzlies te an inhnehtawk viau a, chungnung zawkah an ian tan chhawk zak zak. Lakers hi quarter khatna leh quarter linaah chungnung zawk an ni a. Grizzlies hi quarter hnihna leh quarter thumnaah chungnung zawk an ni ve leh. An inchungnung chhawk zak zak hnuin hun pangngaiah chak zawk an awm thei lova, an inhnehtawk phawt. Hun pangngaiah chak zawk an awm theih loh vangin over-time khelh chhunzawm a ni a. Over-time-ah hian LA Lakers in point 13 an thawhchhuah laiin, Grizzlies hian point 7 chauh an thawkchhuak ve thung a. Lakes hi point 117-111 in an chak ta a ni.
Inkhel pawimawh takah an chak leh tak vangin LA Lakers hian series-ah 3-1 in hma an hruai a, semi-final lut turin vawi khat chak chiah an mamawh tawh. Regular season-ah chetha lovin, play-off khel phak mai lo mah se play-in-ah an chak a, play-off ah an chet that zui leh vangin LA Lakers hian champion tumin hma lam an pan.
Grizzlis an hneh nawn leh tum hian Lakers player pawimawh LaBron James chuan point 22 a thawkchhuak a. Point thawkchhuak tam lau lo mah se ball sawhlet vawi 20 zet a lak tlin vangin a chetha em em a, hnehna an chan theih nana player thawhhlawk tak a ni.
Thawhleh zinga inkhel dangah 2-1 hmahruai tawh Miami Heat chuan Milwaukee Bucks an hneh nawn leh a, semi-final lut turin vawi khat chak chiah an mamawh tawh. Heat in point 119-114 a Bucks an hneh tum hian Jimmy Butler chuan point 56 zet a thawkchhuak a, a chetha hle.
Lakers in semi-final an hnaih
Get real time updates directly on you device, subscribe now.
Prev Post
Next Post