Zaninah EPL final

Zanin hian English Premier League khelh chhunzawm a ni dawn a, zan laiah inkhel pali a awm ang. Zanina inkhel tur zingah champion lai Manchester City in Etihad Stadium-a hmahruaitu Arsenal an mikhual tur a ni. Manchester City leh Arsean inkhel tur hi champion tur zawk tihchianna, EPL final ang hiala ngaih a ni.
Champion lai Manchester Cuty lakah point riat zeta hmahruai fal hman tawh Arsenal hian tunhnaiah chak an harsat a, an khelh hnuhnung vawi thumah chak zo lovin, an khingpuite nen an inhnehtawk vek. Inkhel pawimawh takah an chak theih loh zawn vangin an hmahruaina a pan viau tawh a, an champion ve tawh nge nge dawna ngaih a nih hman laiin an champion zo lo leh nge nge tura ngaihna lian tak a awm leh ta zawk.
Manchester City Assistant manager ni a, Pep Guardiola thlachhangdawltu lo ni tawh thin Mikel Arteta enkawl Arsenal hian point ngain hma an hruai fal mek a. An hmahruaina chauh en chuan champion theihna hun tha an la neia ngaih a ni. An point hmuh zat chauh en lova, an khelh zat en erawh chuan Arsenal hmahruaina hi a derthawng viau tawh thung. Gunners hian khelh 32 atangin point 75 an hmu a, table chung berah an awm mek. An hnuai chiaha awm City nen an inkarah point nga tlazep bawk mah se City ai hian vawi hnih laiin an khel tam zawk thung. An khelh tlem zawknaah an chak ve ve a nih chuan City hian awlsam tein Arsenal an lehpel daih dawn. Zanin hian an mualah Pep Guardiola team City an chak a nih chuan City hi champion thara puan ngam an ni hial awm e!
Manchester City ten an intum tawh zawng zawngah Arsenal hian record nei tha zawk mah se tunhnaiah erawh City an ngam lo ta viau thung. City nen an inhmachhawn hnuhnung vawi sarih ngawtah Gunners hi tlawm zawkah an tang vek a. Season kal mekah hian February 15, 2023 khan Emirates Stadium-ah an inkhel a, hemi tum hian City hian 3-1 in hnehna an chang leh tho. Tunhnaiah an ngam loh em vang hian Etihad Stadium-a lenglut tur Arsenal hi chak tura ngaih an ni lova, point an hlawhchhuak thei hram a nih chuan an tan result tha a ni ang.
Zan lai dar 12:30-ah Arsenal nen an inhma-chhawn tur hi City manager Pep Guardiola chuan EPL Champion tur tihchianna, EPL final a nih thu a sawi a. Pep hian zanina point thum hmu zawk zawk hi an champion zui mai turah a ngai. Arsenal manager Mikel Arteta erawh chuan a pu hlui Guardiola ngaihdan hi a tawmpui chiah lo thung a. City nen an inhmachhawn tur hi champion tur zawk tihchianna a ala nih loh thu a sawi ve thung.
Arteta hian an hmachhawn tur City chu hneh an har dawn tih an hriat thu a sawi a. Harsa taka hnehna sualchhuah tuma an inbuatsaih thu a sawi tel bawk. “Zanin hian City hneh tehreng pawh ni ila kan champion tihna a la ni dawn chuang lo. Kan dinhmun tha hret dawn bawk mah se, champion tuma inelna hautak tak kan hmachhawn zui a la ngai dawn. Chumi tur chuan kan inpeih e” a ti.
Inkhel pawimawh takah City an hmachhawn hunah hian Arsenal player pawimawh William Saliba chu a la inlan thei lo tura ngaih a ni. Defender pawimawh Saliba awm lo hi Arsenal hian an tuar em em a, an chak ngei tura ngaihna inkhelah pawh an goal venghim zo lovin an chak zo lova, goal an chhuah leh khut thin. Arsenal tan chuan Saliba dam hun tluka thil nghahhlelhawm a awm kher lo ang.
Mit fukna tur Haaland
EPL final tia hiala sawi inkhel pawimawh takah hian mi mit fuk thupna tur player pakhat a awm a, amah chu Erling Haaland a ni. Haaland hian goal a thun a nih chuan EPL-a hnuhma tha dang a hnutchhiah belh thei dawn.
EPL-ah team 20 awm a, game 38 khelh a nih hnuah season khata goal thun hnem ber chu Liverpool forward Mohamed Salah a ni thin a. Aigupta tlangval Salah hian season khata goal 32 a lo thun tawh. City leh Norway forward Haaland hian Salah record tlukin season kal mekah hian goal 32 a thun tling tawh. Arsenal lakah hian goal khat a thun a nih chuan Salah record a khum dawn a. EPL-ah game 38 khelh a nih hnua goal thun hnem ber record thar a siam ang. Arsenal lakah hian hattrick a siam a nih chuan season khatah EPL a goal thun hnem ber Alan Shearer leh Andrew Cole record khumin record thar a siam thei dawn. Haaland hian record thar a siam thei dawn em tih football ngainatu ten an ngaichang thuap ang.