Lakhuihtheiah zau zawka hmalak…

Khawzawl district hnuaia lakhuihthei chingtute tharchhuah lakhuihthei quintal 5 chu market zawnna sample atan nimin khan Mumbai lamah agriculture minister-in a vailiam a.
Lakhuihthei chingtute hi Mission Organic Value Chain Development for North East Region (MOVCD-NER) Phase III hnuaia inziak lut niin, member 500 an ni a, nikum khan lakhuihthei metric ton 30 dawn an thar chhuak a, Sonipat, Haryana lamah metric tonne 18 thawnchhuah a lo ni tawh a. Tun tuma lakhuihthei sample quintal 5 hmang hian market nghet hmuh theih an inbeisei a. Lakhuihthei chingtute hian lakhuihthei tui, jam leh squash te an buaipui chho mek a, an zuar chhuak thei thuai dawn niin an sawi bawk a ni.
Tunhma kha chuan lakhuihthei chingtute khan local market bak hmachhuan tur an nei ngai meuh lo va, hralh theih loh tam tak a tawih nghek nghuk mai thin a nih kha. Tunah chuan state pawn lamah market kan lo zawng thiam chho ve tan ta a, hma kan sawn ve hret ta.
Lakhuihthei hi district dangah pawh tha taka tharchhuah theih a ni tih a lang a. A dehralna lam hi awmze nei zawka kalpui theih a nih phawt chuan kuthnathawktu tam takin eizawnna atan lakhuihthei hi an hmang thei dawn tihna a ni a, zau zawka hmalakna tur ngaihtuah hi state sawrkar hian a ngaihtuah thiam a pawimawh dawn hle a ni.
Hetih rual hian. state pawn lama lakhuihthei a puma thawnchhuah dan ngaihtuah ringawt hi market zawn dan tur a ni hran lo va, lakhuihthei atanga jam leh squash siam chhuah lamah lian zawka tan kan lak a pawimawh. State dang atanga kan chawk luh, lakhuihthei atanga eitur hrang hrang an siam chhuah ang hi kan state chhung ngei atangin siam chhuah ve theih a ni a, state dangin an tih theih chuan keini pawhin kan ti thei tih hi a chiang em em a. He lama hma lak leh lak lohah hian tih theih leh theih loh chu a innghat mai a ni.