Sudan rama inkahhaina siam pawtsei

Sudan-a sipai pawl pahnih inbei te chuan inkahhaina ni thum awh a ral hma lawkin ni thum dang atan inkahhaina neih leh an rem ti a.
Darkar 72 inkahhai pawhsei a nih theih nan hian a thenawm ram te bakah, US, UK leh UN ten hma an la nasa a ni.
Mahse, tichung chuan capital Khartoum-ah chuan nasa taka inbeihna a thleng tho thung a. A hmaa inkahhaina siam hmangin mi sang tam tak ten Sudan an chhuahsan theih phah a, khawvel ram rhang hrang ten an khua leh tui te an lakchhuah theih phah a ni.
Kar hnih dawn army leh an hmelma paramilitary force te inbeihna avangin mi za telin nunna an chan phah tawh a ni.
Hetih lai hian South Sudan chuan inkahhai a awm theih nan palai hna a thawh theih thu sawiin Sudan army chuan inkahhaina a awm theih nan aiawh tirh a tum thu a sawi nghal bawk.
US Secretary of State Antony Blinken chuan Washington chuan inkahhaina a awm theih nan hma a lak reng thu sawiin duhthusama zawm ni lo mahse inkahhaina puan chuan tharum thawhna a titlem tiin a sawi bawk.
Mahse White House thupuangtu Karine Jean-Pierre chuan thil awmdanin chhiat lam a pan zual theih reng thu a sawi thung a. RSF te chuan Army te chuan Khartoum a an hmun chu inkahhai awm chungin an bei reng an ti bawk.
Civilian sorkar a foreign minister Maryam al-Sadiq al-Mahdi chuan inkahhai a awm chungin civilian te chu hlauhlawpin an la awm tiin a sawi a.
“Inkahhai puan a ni chungin inbeihna awm reng tho va. Indo thlawhna hmanga bomb hmanga inbeihna chhun leh zan zawmin a la thleng reng,” tiin a sawi bawk.
Khartoum mai bakah khawthlang lama Darfur region leh province dangah pawh inbeihna a la thleng reng tia sawi a ni bawk.
Sudan buainaah hian chhinchhiah chinah ringawt pawh mi 512 in nunna an chan tawh a, hliam tuar 4,200 an awm tawh bawk a, a tak takah chuan thi leh hliam hi hei aia la tam daih tura ngaih a ni.
World Health Organization chuan inbeihna a thlen zui zel chuan natna leh harsatna hrang hrang avangin mi tam takin nunna an chan belh dawn tiin a sawi a.
Health officials te chuan buaina hmuna damdawi In tam ber te chu kalpui hleih theih lohin a awm an ti bawk a, Khartoum a health facility 60% te chu pangngai kal thei lo an ti bawk.
David Miliband, head of the International Rescue Committee leh British foreign secretary hlui ni bawk chuan khawvel ram hrang hrang ten an khua leh tui te lakchhuah dan ngawt an ngaihtuah avangin Sudan buaina tak tak chu ngaihthahin a awm zawk tiin a sawi a.
“Tun hnai ni sawm chhunga media tena an thlurbing ber chu Sudan atanga mi sang tam tak lakchhuah ringawt niin chuvang chuan Sudan ram chhunga mi maktaduai tel te harsatna chu ngaihthahin a awm phah a ni” tiin a sawi a.
“Sudan atanga lakchhuah ngai mi sang tam tak te nunna chu a pawimawh tehmeuh mai mahse Sudan ram chhungah maktaduai 45 vel te chu?” tiin zawhna a siam a.
“Sudan ram chhungah tanpui mamawh ngawih ngawih maktaduai 15 vel an awma ngaih a ni a, International Rescue Committee te hian ram dang mi sang khat chuang te lakchhuahin harsatna su kiangah an inngai palh ang e” tiin Miliband chuan a sawi bawk.
Sudan atang han foreigner te lakchhuah hna thawh mek zel niin mahse mi tam tak lakchhuah lohin an la awm a, airport te chu a lun em avangin harsatna an tawk nasa bawk a.
Local civilian te pawhin capital Khartoum chu chhuahsan zelin hei mai bakah han food, water leh fuel supply lamah tlakchhamna nasa tak a awm mek bawk.
Sudan buaina hi 15 April-a intan ni berin regular army leh RSF te inbakkaihnain a hrin a ni a.
Army commander Gen Abdel Fattah al9-Burhan leh RSF chief Gen Mhamed Hamdan Dagalo, Hemdti tia hriat lar te chuan Sudan ram civilian rorelna kuta ah dan turah ngaihdan inang lo an neih vang leh a bik takin RSF 100,000 vel lai Sudan army nena hmehbel tum chungchangah ngaihdan inan loh avanga buaina chhuak a ni ber.
Hruaitu pahnih te hian thuneihna hloh zawk nih an hreh hle a, a chhan ber pawh an pahnih hian kum 20 kaltaa Darfur a war crime an kalpui avanga International Criminal Court thiamloh chantir nih an hlauh em vang a ni tia sawi a ni.