Lalna leh thuneihna atchilhna chu Pathian duh loh zawng a ni a, sum leh pai hmachhuana campaign chu Pathian lawmzawng a ni lo tih ZPM president Lalliansawta chuan a sawi.
-- Advertisement --
ZPM Gen. Hqrs Campaign Committee buatsaihin Nilaini khan Aizawlah an party mite intuaitharna buatsaih a ni a. He hun hmanpuitu ZPM president chuan mihringte chu mawhphurhna hrang hrang neia siam kan ni a, kan mawhphurhna tha taka hlen tura buatsaih kan ni a, Pathianin min siam ang chhan taka kan nun theihna turin politics tha kan mamawh a, politics tha siam tur leh Pathian duh anga he leilung hi enkawl leh sawngbawl a nih theihna turin thinlung thianghlim leh rilru tha kan put a ngai, tiin a sawi.
“Lalna leh thuneihna atchilhna hi Pathian duh loh zawng tak a ni a, roreltu tam tak a duh loh zawnga khawsa thin pawh an lalthutthleng atangin a hnukthla thin. ZPM-in kan aupui ber kalphung thar hi sawrkar hun chauha hman tur ni loin, vawiin atang hian kan hmang tur a ni. Sum leh pai hmachhuana campaign hi Pathian lawmzawng a nih loh avangin, kan rinchhan Pathian duh zawngin campaign kan bei anga, kan hmahruaitu Pathian a nih phawt chuan hnehna kan chang ngei ang tih ring tlat ang u,” Lalliansawta hian a ti.