Lalruali leh Capt. LZ Sailo Birth Centenary lawm

September ni 12 khan Mizo Department, Mizoram University buaitsaihin Synod Conference Hall-ah thu leh hla ziak thiam pahnih Lalruali leh Capt. LZ. Sailo te kum za tlin (Birth Centenary) lawmna hun hman a ni.
Chawhma lamah Lalruali kum za tlin lawmna pual bika hun hman a ni a, Dr. Zoramdinthara, associate professor, Mizo Department, MZU kaihhruaia hun hman niin, Professor Laltluangliana Khiangte, Dean, School of Humanities and Languages-in thuhma theh a sawi. Lalrammawia Ngente, associate professor, Govt. Johnson College chuan ‘Lalruali Thu leh Hla Hlutna’ tih thupui a sawi.
He huna khuallian, Lalrinenga Sailo, Mayor, Aizawl Municipal Council chuan Thu leh hla phuahtu Lalruali chu mi hrisel lo leh bawrhsawm ni mah se a rilru leh ngaihtuahna erawh a natnain a bawhbet zo lo tiin a sawi a, chung a ngaihtuahna leh a vei zawng chu thu leh hla tha tak takah a chantir a, Zofaten kum za a liam tawh hnuah pawh kan zinga awm ang maiin kan hriat theih phah a, a hlate chu kan thlarau nun chawmtu tha a ni tiin a sawi.
Lalsangzuala, assistant professor, Mizo Dept. MZU-in lawmthu sawiin chawhma hun khar a, chawhnu lamah Capt. LZ Sailo puala hun hman niin, Dr Ruth Lalremruati, HoD, Mizo Department, MZU-in a kaihruai.
R Lallianzuala, Mizo Writers Association president-in ‘Capt. LZ Sailo Thu leh Hla Hlutna’ tih thupui a sawi a, he huna khuallian, John Neihlaia, Chief Information Commissioner chuan, Capt. LZ. Sailo-in theih tawpa Zofate thinlunga insuihkhawm lehna chi a tuh chu thangthar zelten hre ve se a tih thu a sawi a, Capt. LZ Sailo insuihkhawm duhna thinlung chu ropui a tih thu a sawi bawk. Capt LZ Sailo hla awm khawmna Chhinglung Messenger tih a tlangzarh bawk. Dr Lalzarzova, assistant professor, Mizo Dept. MZU chuan lawmthu sawiin hun khar a ni.
He hunah hian Lalruali leh Capt. LZ Sailo te kum 100 tlinna lawm nan cake siam niin, an thil hlui leh thuam hluite pho chhuah a ni a. An chhungte thahnem takin he hun hi an hmanpui a ni.