Lamka leh Aizawl helicopter service

Union government chuan helicopter service inter-State route pahnih a pawm thar.
Union Ministry of Home Affairs (MHA) chuan thuchhuah a siamah helicopter kawng thar chu Lamka atanga Aizawl niin pakhat dang leh chu Kangpokpi/Senapati to Dimapur, Nagaland tiin a sawi.
May 3-a Manipur-a buaina chhuah hnua Imphal Valley-a cheng Kuki-Zomi te nawr tawm tuma hill district a nawrchhuah tumna kal zelah leh Meitei mi te hill district a chengte Valley area-a nawrchhuah an nihnaah community pahnih te chuan harsatna tawh hlauin kawngpui awmsa te zalen takin an hmang hleithei lo a ni.
Hnam anga inthliarna a thlen hnuah Union Home Minister Amit Shah hmalaknain subsidy scheme hnuaiah Churachandpur leh Imphal airport inkarah helicopter service tir a ni tawh a.
Union government chuan tuna helicopter service na thar tur hi subsidy scheme hnuaiah tho kalpui tur tiin chuan man Rs 2,000 tur niin State leh Central te chuan phurrit an inchhawk tawn dawn a ni. Hei bakah hian extra flying hours pawh tuna service-na tur tharah hian remtihsak a ni bawk.
75% Helicopter Subsidy Scheme hnuaiah hian ceiling 750 flying hours per annum a awm a, he limit tihsan a nih theih nan hian Union government chuan State sorkar pawhin rawtna tul a ti a nih chuan a siam thei, a ti bawk.
Ginza Vualzong, Indigenous Tribal Leaders’ Forum (ITLF) chuan helicopter service chu lawmawm a tih thu sawiin mahse hei mai bakah hian Lamka, Kangpokpi leh Moreh tlawh tur service mamawh a ni tiin a sawi.