Lammual ram thing kih leh tum, CESJ te’n dodal
A ni hnihna atan April ni 15-ah Mizoram sorkarin Lammual rama thingkung kih chhunzawm a tum a, Centre for Environment & Social Justice (CESJ) te’n an dodal avangin thing kih hna hi chhunzawm a ni ta lo.Thing kit tura rawihte’n an hna an thawh dawn laiin CESJ te hi a hmunah kalin kit lo turin an ngen a, a kit tura rawihte’n a thu a nih loh thuin an chhang ve thung. Chumi hnuah thuneitu lam an inrawlh a, thing hi kih a ni ta lo.
April ni 14 khan thingkung hi an kit tawh a, hemi ni hian 10 an kit nia hriat a ni. Lammual rama thingkungah hian sorkarin kih tur an chhinchhiah fel tawh a, thingkungah hian a senin number an ziak a, number inziahna chu kih tur a ni. Thingkung hi 176 kih tura chhinchhiah a ni.
CESJ te hian thingkung kita kawngpui siamtu tur PWD te hnenah thingkung hi kit lova phun sawn tur leh kawngpui laia thingkung chu awmtir mai tura ngenin ziakin an thlen a, Mizoram Pollution Control Board-ah boruak thianghlim siamtu thing kit lo tura ‘stay’ turin an ngen bawk.
CESJ te hian 2024 khan urban forestry lama mithiamte ruaiin research an lo ti tawh a, chuta an hmuh dan chuan, Lammual ram chhunga thingkungte hian carbon metric tonne 4830.04 a vawng tha mek a, thing hi kih a nih chuan carbon chutiang zat chu a sah huk dawn a ni. Thingkung hrang hrangin kum tluana atmospheric carbon (boruaka carbon lengvel) an lo tlen fai thin hi kan chan dawn tihna a ni tih a ni bawk.
Heng vang hian CESJ chuan Aizawl mihring te tan, thing 176 kih tur a an mark hi venghim turin a tawp thlengin kan tang dawn a, mipui pawhin min thlawp turin kan ngen a ni,” CESJ chuan an ti.
Sorkarin thingkung kih a tum chhante an pawm loh thu an sawi a, thingkung heti zat kita Bazar Bungkawn leh Dak Inpui inkar kawng zauh hian Aizawl khawpui traffic a tithawl dawna an hriat loh thu sawiin, thingkung kih chhiat tur nen a inhen lova an hriat thu an sawi.
Thing kih tura chhinchhiahah hian Lammual gate pui bula hmawng lian, 1850-a mi tawh pawh a tel a, CESJ hruaitute chuan thingkung a nih avanga hlu tak tak bakah thing upa, Aizawl hmel timawitu pawh a awm teuh tih an sawi a, hetiang te kih tura tih a nih hi mak an tih thu an sawi.
Lammual rama thingkung kih tumna hi dodal zel an tum a, chhun zan zawma ven hial a tul an tih thu an sawi bawk.