Lammual ram thing kit nual tawh

Lammual rama thingkung an kit \an tawh a, April ni 14 khan Quarter Guard bul vela thing an kit. Hemi ni hian thing 10 vel an kit a ni.Lammual ramah hian thingkung a tam a, Mizoram sorkarin thingkung kih tur hi chhinchhiahin, thingkunga number inziak chu kih tur tihna a ni.
Lammual gate-pui chhaka awm Quarter Guard hi Mizote history-a thil pawimawh a ni a, Mizoram sorkar chuan Quarter Guard velah hian thiamthil phochhuahna leh a zawrhna hmun te siam a tum a, exhibition tihna tur te siam a tum. Chmi atan chuan PWD-in project an siam a, cheng vaibelchhe 13.18 a awm. Chu project chu thawh tan a ni tawh.
Chutih laiin Chapchar Kut lai khan Quarter Guard kawtah hian food stall an siam a, ni hnih an thut hnuah insawntir an ni. Aizawl bawrhsap-in commerce & industries department-ah lehkha a thawn a, Quarter Guard hi hmun hlui ro tling ‘heritage site’ a nih avangin hetianga hmana rem loh thu Sewa Bhawan, New Delhi atangin thu an dawng tih a sawi a, inphote pawh an insawn zui a ni.
Mizoram sorkarin a tum danah erawh Quarter Guard velah hian Heritage Court siamin building hlui paruk an thiat ang a, thiamthil phochhuahna leh a zawrhna hmun te siam a nih bakah mi 50 lenna tur restaurant siam a ni ang a, multipurpose hall sak tum a ni bawk. Zan lama mawi tak eng chhit (night illumination) te pawh awm tura ruahman a ni.