MNF president-in rammut lai atanga CM a nih chhoh dan chanchin a ziak

MNF president Zoramthanga’n ama chanchin a ziahna lehkhabu, “From Guerrilla Fighter to Chief Minister” tih chu Thawhlehni khan larsap Gen. Vijay Kumar Singh (Retd) chuan a tlangzarh.
Larsap chuan a lehkhabu tlangzarh chu mimal chanchin ziahna ni mai lo, Mizoram history leh politics hriatchianna atana tangkai, a ziaktu tawnhriat atanga buatsaih, Mizoram hun tawn pawimawh tak tarlanna a ni, tiin, “Rambuai lai atanga mipui sawrkar hnuaia mawhphurhna leh hruaitu dinhmun pawimawh tak thlen dan chanchin tarlanna a ni. He lehkhabu hian inbiakna, inhriatthiamna leh tumruhna hmangin harsatnate a chinfel theih tih a lantir a ni,” a ti.
A ziaktu taimakna fakawm a tih thu sawiin, inzirmi a nihna chuan hlawhtlinna tam tak a pek thu leh, tum chuan kawng a awm tih a taka a entir thu a sawi bawk.
Mizoram-in chanchin danglam bik a nei a, he lehkhabu ah hian Mizorama thil thleng inlumlet dan fiah taka thailan a ni tih Gen. Vijay Kumar Singh (Retd) hian a sawi. A ziaktuin ama tawnhriat ngei hmanga thil thlen dan a lo chhinchhiah thlap chu fakawm a tih thu sawiin, “Hei hian thangtharte hnenah rambuai awmzia bakah zalenna leh mipui rorelna hlut zia a hriatthiam tir thei dawn a. Thalai, zirlai, zirbingmi, dan siamtute leh mipuiin tangkai taka an hman ngei ka beisei,” a ti.
Lehkhabu ziaktu, Mizoram chief minister hlui Zoramthanga chuan lehkhabu a khawr pum dan a sawi a. Kum 50 lai diary tha taka a vawnthat chu thu lakna atan a hmang a. Lehkhabu chhunga thil thleng a tarlan chu amah ngei a tel ve na deuh vek a ni tih a sawi. Lehkhabu khawr pum a nih theihna tura buaipuitute chungah lawmthu sawiin, Mizote bakah hnam dang pawhin Mizo chanchin an hriatchian lehzualna atan tangkai taka hman a nih a beisei tih a sawi a ni.
Larsap Gen. Vijay Kumar Singh (Retd) nen an intawn dan inpersan tak pawh Zoramthanga hian sawi chhuakin, inhre miah loa 1971 December 16 East Pakistan War laia lo inep tawh, khatih laia Indian Army-a lieutenant, tuna Mizoram larsap ni ta in, India laka zalenna suala lo rammu tawh buatsaih lehkhabu a tlangzarh ta chu thil thleng zen zen lo leh mak dangdai tak a ni tih a sawi bawk.
“From Guerrilla Fighter to Chief Minister” tih lehkhabu hi Penguin Random House chhuah a ni a. Online-in Amazon-ah a lei theih bakah tlangzarh a nih hnu hian lehkhabu zawrhna dawr hrang hrangah lei theih a ni.