Lammualah exhibition nei zo

Lammualah exhibition nei zo
Aizawl Sipai Lammuala PM Vishwakarma Exhibition chu Inrinni khan neih zawh a ni a. Zirtawpni khan larsap-in exhibition hi tlawhin, Inrinni khan chief secretary chuan a kharna a hmanpui a ni.
Sawrkar laipui Ministry of Micro Small and Medium Enterprises (MSME) hnuai MSME Development & Facilitation Office Aizawl leh Mizoram Commerce & Industries department tangdun buatsaih November 28-30 thleng awh hi PM Vishwakarma Scheme hamthatna dawngtute puala Exhibition -cum- Trade Fair hi buatsaih a ni.
A hmuna tlawhtu Larsap Dr Hari Babu Kambhampati hian official leh PM Vishwakarma Scheme hamthatna dawngtute a kawm a. Hemi kaihhnawih hmalatu hrang hrang chu PM Vishwakarma Scheme a nihna tur ang taka kalpui a nih theihnan leh a chhawr tangkai turten an tangkaipui theihnan theihtawp chhuah turin a chah a. He scheme hian kutthemthiamte anmahni kutke hmanga dinchhuah tir a tum a ni, tiin, beneficiary-te tana tanpuina sum leh hmanraw mamawh pek, thimthil zirtir bakah a hralhna thlenga ngaihven pui turin a chah. Trade hrang hrang zingah Mizoram leh a chengte mil leh theihna zawn ngaihtuah tel turin thawktute a chah a; banker-te chu a taka thawkte loan pe hreh lo turin a chah. PM Vishwakarma Scheme-in a huam phak lohte pawh Mudra scheme, cheng nuai 10 thlenga lak theih hnuaia rinluh dan ngaihtuah pui turin a chah a ni.
A kharna hi chief secretary Khilli Ram Meena leh Industries secretary Dr Lalzirmawia Changte ten an hmanpui a ni.
PM Vishwakarma Scheme hi 2023 September-a India ram puma Prime minister Narendra Modi chuan a tlangzarh a. Central sector scheme niin, sawrkar laipui bultum a ni. Kut themthiamna kawng hrang hranga thil siamchhuah, thiamna neite bultanna leh hma an lak zelna tura tanpuina leh khaichhuahna atana a bik taka duan a ni. Kum 5 chhung (2023- 2024 atanga 2027- 2028) thleng tura duan a ni.
Tarlan a nih danin, vawiin thlengin Mizoramah PM Vishwakarma Scheme dilna lut 10742 a awm a, heng zinga 2609 chuan selection stage thum an paltlang tawh a, a dangte pawh buaipui mek zel a ni. Carpentry trade bikah training kalpui tawh niin, mi 194-in training an zo a, loan diltu 59 zinga 4 hnenah loan pek chhuah tawh a ni. Exhibition cum Trade Fair ah hian mahni kut themthiam thil pho chhuak mi 41 an awm a ni.
PM Vishwakarma Scheme-ah hian kutthemthiamna lam hawi trade hrang hrang 18 a awm a. Training zote chu honorarium Rs 3000 leh hmanraw leina tur Rs 15000 pek an ni dawn a, dahkham awm loin loan cheng nuai 3 thleng lak theih a ni. Basic training zo ten loan cheng nuai 1 an la thei a, an rulh that a, advance training an zawh chuan loan nuai 2 an puk leh thei a, 5%-in a pung a ni.
PM Vishwakarma Exhibition -cum- Trade Fair-ah hian dawr 50 chuang hawn a ni a. Bank, National Small Industries Corporation, KVI Commission, GeM, RDSDE leh a dangte an inhawn bakah PM Vishwakarma Scheme-a inziaklut duh tan Common Service Centre hawn a ni bawk.