Laos-ah zu tha lo in nia rin pathum boral

Laos-ah zu tha lo in nia rin pathum boral
Laos thuneitute chuan zu tha lo in nia rin ramdang mi pathum an awm thu sawiin, an pathum hian an boral phah vek thu an sawi.
He thil thlenna hmun hi khualzinte awm tamna hmun, lui kama khawpui Vang Vieng-a Nana hostel-ah vek a nih thu an sawi a, Danish tleirawl pahnih, kum 20 leh 21 mi bakah American mi kum 57 te an nih thu sawiin, an hming an tarlang vek bawk.
He thil thleng hi methanol poisoning vang nia rin a nih thu an sawi a, khualzin dang pathum tho chu kar hmasa khan an in turah methanol poison a tel nia rinhlelh vangin an lo boral tawh bawk tih an sawi.
Vang Vieng Governor Bounchan Malavong chuan he thihna thlenna hmun hi tlawh nghalin, chhui chian a nih tur thu leh thihna thlenga mawhphurtute chu thubuai siamsak ngei a tiam bawk.
Thuneitute sawidanin Danish tleirawl pahnihte hi an room chhungah nikhaw hre lovin an hmu a, a hma zanah khawpui chhungah bar-ah an chhuak ngei nia sawi a ni. Damdawi in panpui nghal nimahse an harhchhuak zo tawh lo a, hemi ni vek hian American tourist hi a room atanga a thochhuak lo tih hriat a nih hnuin a dinhmun enfiah a ni a, a khumah thiin an hmu bawk. A taksaah hliam hnuhma a awm loh bakah a mutna bulah a zu inna ni ngeia rin glass leh um an hmuh bawk avangin a zu in a damdawi hnathawh ni ngeia rin a ni bawk.