Mizoram Lokayukta Act 2014 bung 47-in a phut angin, Mizoram Lokayukta chairperson Lalmalsawma, IAS (Rtd) chuan Nilaini khan larsap Gen. Vijay Kumar Singh (Retd) hnenah Mizoram Lokayukta Annual Report 7-na a thehlut. Annual report hian 2025 April 1 atanga 2026 March 31 inkar a huam a, Mizoram Legislative Assembly thutkhawmah pharh a ni ang.
Mizoram Lokayukta chairperson leh amah tawiawmtu member pahnih – Lalsanglura, MPS (Rtd) leh Joel Joseph Denga, MJS (Rtd) chuan, Lokayukta hmalakna leh hnathawh dan tlangpui bakah thubuai chinfel tawh dan, dik leh langtlang zawka rorelna kalpui zel dan tur larsap hi an hrilhfiah.
Mizoram Lokayukta Annual Report pasarihna tarlan danin, 2025- 2026 kum chhung khan thubuai lut thar 18 a awm a. Case 15 preliminary inquiry tura ziahluh niin, Anti-Corruption Bureau hnehah case 3 leh Inquiry Wing Mizoram Lokayukta hnehah case 12 pek a ni. Hemi hun chhung hian thubuai 12 chinfel /khar a ni.
2019 March-a Mizoram Lokayukta din a nih atanga vawiin thlengin thubuai 101 ziahluh a ni tawh a, heng zinga 74 hi preliminary inquiry tura ziahluh a ni. Chhuichian (investigation) turin case 37 ziahluh a ni a, prosecution tura court-a case thehluh tawh 17 awmin, case khar tawh 52 a awm.
Eiruk thubuai chu engtik lai pawhin a thlawn vekin Mizoram Lokayukta office MINECO-ah lehkha pheka ziakin emaw, email – Mizoram.lokayukta@mizoram.gov.in ah thlen theih a ni tih sawi a ni a. Mahni nihna tilang duh lo chu an nihna thup sak thin a nih laiin, Lokayukta lam atanga biakpawh theihna tur erawh dah tur a ni.
Get real time updates directly on you device, subscribe now.
Prev Post