Luisaah intodelh kan tum dawn – Chief minister

Chief Minister Blue Mission hnuaiah sawrkar chuan lui sa lama intodelh tumin hma a la dawn tih chief minister Lalduhoma chuan a sawi.
Aizawl district-a Tinghmun khuaa Tinghmun Allied Farming Cooperative Society Ltd (TAFCOS) chuan Nilaini khan an kum 25 tlin, Silver Jubilee an lawm a. Hmanpuitu chief minister hian, Ratu constituency bialtu a nih laia TAFCOS hmalaknaa Ting Dil an khuah theihnana tanpui theitu a ni chu a inchhuang a. Dil a lo awm takah chuan a kaihhnawih hmasawnna awm thei pawh an chan zel a duhsak tih a sawi.
Sawrkarin hmachhawp tam tak a nei a. Silk thar tam lamah Assam chiah phak loh an la nei a. Chief Minister Blue Mission hnuaiah lui sa lama intodelh an tum bawk tih sawiin, sawrkar hmalakna awm apiang chhawr tangkai tum turin a chah.
Hmanpuitu dang minister B Lalchhanzova pawhin, thil tha tih duhna thinlung an neih phawt chuan remchang leh thawhpui tur an awm zel tih a sawi a. Tinghmun khaw mipui inlungrualna fakin, hmachhawp lian leh ropui nei turin a fuih Thil tha tih avanga tuar hlau lo tur leh mahni khua leh ram hmangaih tlat turin a chah bawk.
TAFCOS hi 2000 January 18-a din a ni a. Society member-te hmasawn theihnan vawk vulh, dawr siam leh AMFU hnuaiah aieng leh thlai hrang hrang chingin hma an la a. An hmalakna lian ber chu Ting Dil khuah niin, 2009 March 11-ah hna an tan. Dil hi a dung metre 516, a vang metre 100 leh a thuk lai ber metre 7 a ni.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More