Larsap-in grape winery a tlawh

Ni hnih chama Champhai tlawha thang mek larsap Hari Babu Kambhampati chuan Nilaini khan Champhai Winery Tlangsam tlawhin an hmalakna a enfiah a; Champhal Grape Growers Society leh Hnahlan Grape Growers and Processing Cooperative Society Limited hruaitute a kawm.

Larsap-in grape winery a tlawh
Ni hnih chama Champhai tlawha thang mek larsap Hari Babu Kambhampati chuan Nilaini khan Champhai Winery Tlangsam tlawhin an hmalakna a enfiah a; Champhal Grape Growers Society leh Hnahlan Grape Growers and Processing Cooperative Society Limited hruaitute a kawm.

Larsap chuan Champhai district-a winery pahnih a awm leh loneitute intelkhawmin an kalpui chu ropui a tih thu te, grape chingtuten harsatna an tawk chu pawi a tih thu te sawiin, sawrkarin dan thar siama hma a la chu lawmawm a tih thu a sawi. Wine siam chu food processing hnuaia a awm a nih angin, agriculture product-te cheibawla siam danglam value addition chu hmalakna pawimawh tak a nih thu te, tun aia nasaa huang zauh leh changtlung zawka kal an tum chu lawmawm a tih thu te a sawi bawk.

Society hruaituten larsap an lo hrilh danin, Mizoram hi hmarchhaka grape thar awmchhun leh India rama grape thar tam 5-na a ni a. Champhai GGS enkawl Champhai Winery hian kum 14 hmel a hmu tawh a, an grape sawngbawl hi Bangalore Blue variety niin, grape quintal 115218 an lei tling tawh a, hemi atan hian Rs 5,78,41,160 an seng tawh. Kum 2010 atang khan grape quintal 918 leiin bul an tan a, kum kalta khan quintal 1144.98 an lei a, an grape lak hi herin a umna zemah an um mek a ni.

MIP sum cheng nuai 83 (loan) hmanga bul tanin, he loan hi 2020 November 9 khan sawrkar chuan rulhlet ngai lo turin grant-ah a leh sak. Champhai Grape Growers Society-ah hian grape chingtu member 134 awm mekin, staff leh worker 30 an awm.

Champhai GGS hian Ministry of Food Processing Industries kaltlangin project an kalpui mek a. DC office kaltlangin Pradhan Mantri Jan Vikas Karyakram hnuaiah Commerce & Industries Department-ah project dil mek a ni bawk. Dan thar hnuaiah winery license an neifel tawh a, state pawn thlenga hralhchhuak thei turin hmachhawp an nei a ni.