Kolasib district huamchhung Khamrang leh Vairengte inkar kawng thawmthat hna thawk mektu contractor pahnih chuan furpui hma in an zawh hman an inbeisei tih an sawi ve ve.
-- Advertisement --
Helai kawng siam hna viltu NHIDCL leh hnathawktu M/s Ratna Infrastructure Pvt Ltd. leh Sadguru Pvt. Ltd. hotute chu Nilaini khan Kolasib district bawrhsap John LT Sanga chuan a kawm a. Kolasib chu Mizoram state luhkapui a nih angin Mizoram hmel lanna a ni tih sawiin, an district tantlang national highway-te chu zinmite zawh tam ber pawl a nih angin, tha taka thawmthat a pawimawh tih a sawi. Fur thlen hmain kawngpui thawmthat hna thawk tura hrilhin an harsatna a sawipui a, a tul anga puih a inpeih tih a hrilh. Inremna an ziah tawh angin, hunbi tuk chhunga thawk zo ngei tur leh, hna tikhawtlai zawnga chhuanlam siam lo turin a hrilh bawk.
Ratna leh Sadguru hotute chuan rel kawng siam avanga bungraw rit tak tak phur lirthei lian tam vangte, tuihawk luankawr mumal awm lo leh bawlhhlawhin a hnawh phui thin vang leh kawng siam laia lirthei tlan lui an tam thin avangin kawng chu a tlo tur angin a tlo loh phah thin tih an sawi.
Sadguru chuan Khamrang leh Kawnpui inkar kawng chu kumin February 20 hmaa siam zawh hman an tum tih an sawi a. Ratna chuan Vairengte leh Bilkhawthlir inkar kawng chu March 15 hmain siam zawh an inbeisei thu an sawi ve thung.
Bawrhsap chuan kawng siam hna chu uluk taka vilpui turin NHIDCL hotute a chah a, an hna kalpui dan a that leh that loh a hmuna a endik tur thu a sawi.