Larsap ngen angin Manipur-ah ralthuam hlan let tam

Larsap ngen angin Manipur-ah ralthuam hlan let tam
Manipur-a phai leh tlangramah Thawhlehni khan thuneitute hnenah ralthuam leh hmanraw dang Thahnem tak hlan a ni a. Governor Ajay Kumar Bhalla-a’n ralthuam ruk leh dan lova kawlte pe kir tura a ngenna chu mipuiah a thawk Tha hle a ni.
Thawhlehni tuk khan Imphal-ah venhim hna thawktute hnenah CMG silai 12, .303 Rifle pahnih, SLR rifle pahnih, SBBL rifle pali, .303 rifle magazine pahnih, CMG silai magazine 12, SLR rifle magazine pahnih, IED pakhat, .303 Rifle mi 33, SLR rifle mu 32 leh SBBL rifle mu panga hlan a ni.
Heng ralthuam hlante hi chanchinbumite hmaah pawh pho chhuah a ni bawk.
Larsapin ralthuamte hlan let tura a ngenna hun tiam a siam chu ni hnih a la awm a. Thawhlehni tuka hlan hi 30 chuang niin phai leh tlangram district hrang hrang atanga hlan a ni.
Governor Bhalla chuan February 20 khan mipuite hnenah venhim hna thawktute ralthuam ruksak leh dan lova lo kawlte chu thuneitute hnenah hlan let turin a ngen a, hun tiam chhunga pe lettute chungah eng thubuai mah siamsak an ni dawn lo tih a sawi bawk.
Manipur Chief Secretary PK Singh pawhin Pathianni khan ralthuam pek let hun hi ni sarih chhung a lo tiam tawh bawk a. Hemi hun a liam hnuah erawh chuan man chhuah a awm chuan a kawltu chu na taka hrem a nih tur thu a puang bawk.
May, 2023 aTanga Manipur-a Meitei leh Kuki hnam inkara buaina chhuakah hian mi 250 chuang thi tawhin mi sang telin an in leh lo an chhuahsan phah a. Lehlam lehlam hian venhim hna thawktute ralthuam ruksakin inbeih nan an hmang nia sawi a ni.
Sorkar laipui chuan Chief Minister N Biren Singh-a a bân hnuah February 13 khan President’s Rule-ah a dah a. Kum 2027 thleng hun la nei assembly pawh tihtawp lailawk rih a ni mek bawk.