Latvia in mawngkawhur hotu lu ber nei

Latvia foreign minister hun rei tak ni tawh Edgars Rinkevics chu he European Union ram ‘head of state’ ni thei mawngkawhur hmasa ber a ni.
Rinkevics hian kum 2011 atang khan foreign minister nihna a chelh tawh a, karkalta Inrinni khan Riga-ah Latvia president atana lakluh a ni.
Latvia president hi ceremonial position mai a ni nachungin legislation veto theihna leh referendum koh theihna thuneihna a nei thung a.
EU hian a hma pawhin ‘heads of governments’ mawngkawhur a nei tawh thin a, mahse mawngkawhur ‘head of state’ a la nei ngai lo thung.
Ram tam takah heads of state leh heads of government chu mihrang an ni a. Entir nan president leh prime minister ang te. Belgian Prime Minster Elio di Rupi kha EU a mawngkawhur head of government dinhmun chelh hmasa ber a ni a.
Rinkevic hi kum 49 niin kum 2014 khan mawngkawhur a nih thu puang niin chumi hnuah LGBT rights tana theihtawpa beitu a ni zui a ni.
Latvia ah hian Gay marriage khap a ni a, mahse, nikum khan constitutional court chuan same sex union pawmpuina erawh a pe thung.
Rinkevic chuan Russia runna lakah Ukraine puihna an chhunzawm zel tur thu a sawi nghal a. Latvia foreign policy chuan tihsual neihna hun a nei lo tia sawiin ‘rang tak, chiang leh fing takin’ thutlukna a siam tur thu a sawi bawk.
Hei bakah hian Rinkevic chuan Latvian thalai te chu ram chhunga intluktlan lohna nasa tak awm chu nuaibo a nih theih nana pen tura tiin ‘kan society a society inthen hranna hi a lian lutuk ta’ tiin a sawi a.
“Ka president laiin Latvia tunlai leh chak zawk, dan lalna leh dikna lalna hmun, mipuite hamthatna ngaihtuah leh huapzoi leh society inzahtawn a awm ngei theih nan hma ka la ang” tiin a sawi a. “Chung te chu kan thawhho chuan tihhlawhtlin theih a ni” tiin a sawi bawk.
Latvia hi Baltic state ram pathum Lithuania leh Estonia te nena kum 2004 a EU zawm ram niin kum 1990 tir choha Soviet Union kehchhia atanga inla hrang ram an ni.