Laureus awards semnaah tennis star an langsar Alcaraz leh Sabalenka kutah chawimawina sang ber a lut
Madrid khawpuia infiammite cvhawimawina ngaihhlut hlawh Laureus Awards 2026 semchhuah takah tennis star pahnih Carlos Alcaraz leh Aryna Sabalenka-te chuan mipa leh hmeichhe chawimawina sang ber ve ve an dawng a; Paris Saint-Germain chu team of the year atan thlan an ni bawk.
Spaniard Alcaraz hi sportsman of the year niin, Belarusian Sabalenka hi sportswoman of the year atan thlan a ni thung.
Tun Thawhtanni zana he chawimawina hlu bik dawng thei turin tennis world number two ni mek Alcaraz chuan nikum khan grand slam title pahnih French Open leh U.S. Open title lain, kumin January thla mai khan Australian Open lallukhum a khum leh bawk.
Hmeichhe lama world numer one ni mek Sabalenka thung hian a zawna a kum hnihna atan U.S. Open title a la ve thung.
Palacio de Cibeles, Madrid, Spain-a Laureus World Sports Awards semchhuah tuma World Sportsman of the Year Award dawngtu Spain chhuanvawr Carlos Alcaraz hi tunah kum 22 mi niin, Sportswoman of the Year latu Aryna Sabalenka hi kum 27 mi a ni.
Tennis pair hian nikum khan khelmual an awpbet hneh hle a, women’s leh men’s tennis ranking-ah number one ni chungin kum an khar ve ve a; Sabalenka hian New York major title a lak bakah Australia leh France-ah final a thleng bawk.
Sabalenka hma hian hmeichhe tennis player rualkhat – Serena Williams, Jennifer Capriati, Justine Henin leh Naomi Osaka-te kutah Laureus Sportswoman of the Year a lo lut tawh a ni.
Nikum khan hmeichhe lama award hlu ber chu American mihang gymnast Simone Biles kuta hlan a nih laiin mipa award sang ber dawngtu chu pole-vaulter Mondo Duplantis a ni thung.
Team of the year chawimawina dawngtu Ligue 1 giants PSG chuan an club history-ah mellung thar phunin an club chanchina a vawi khatna atan nikum khan Champions League trophy an hlawhchhuak ve ta nge nge a; kum 2025 khan French league trophy leh cup an chawi tel bawk.
Tunthla tir lama a Masters title kawl lai humhim hlimhlawt Rory McIlroy chu comeback player of the year atan thlan niin, Official World Golf Ranking-a world number one pawh lo ni tawh Northern Irish professional golfer hian 2025 Masters playoff hnehna a chan hnuah kum 11 chhung a lo thlir tawh nghak chhuakin a career-ah Grand Slam a la kim a; 2025 Masters title a lak hi kuminah a humhim leh a ni.
Barcelona leh Spain rawlthar kum 18 mi lek Lamine Yamal chuan young sportsperson of the year award a dawng a; Formula One champion Lando Norris chu breakthrough athlete of the year atan thlan a ni thung.
German football legend Toni Kroos kutah sporting inspiration award hlan niin, gymnast chawl tawh Nadia Comaneci kutah lifetime achievement honour a lut a; American snowboarder Chloe Kim chuan action sportsperson of the year dawngin, Brazil star Gabriel Araujo chu World Sportsperson of the Year with a Disability Award pek a ni.
Madrid khawpuia lawmman hlanna inkhawm host-tute hi Laureus award dawng tawh ve ve tennis icon Novak Djokovic leh freestyle skiing star Eileen Gu-te niin, tun hi infiammi pahnihin he ceremony na host vawi khatna a ni nghe nghe.
Laureus World Sports Awards nominee-te hi khawvel media liante thlanchhuah niin, award dawngtu tak hi chu Laureus World Sports Academy member 69-te thlan a ni thung.
He award hi kum 2000 atang khan kumtin khel loa semchhuah thin a ni.
Award dawngtute:
Laureus World Sportsman of the Year Award:
Carlos Alcaraz
Laureus World Sportswoman of the Year Award:
Aryna Sabalenka
Laureus World Team of the Year Award:
Paris Saint-Germain
Laureus World Breakthrough of the Year Award:
Lando Norris
Laureus World Comeback of the Year Award:
Rory McIlroy
Laureus World Sportsperson of the Year with
a Disability Award:
Gabriel Araujo
Laureus World Action Sportsperson of the Year Award:
Chloe Kim
Laureus World Young Sportsperson of the Year Award:
Lamine Yamal
Laureus Sporting Inspiration Award:
Toni Kroos
Laureus Sport for Good Award:
Futbol Mas
Laureus Lifetime Achievement Award:
Nadia Comaneci