Lawmthu sawi nachang hre turin CM-in a chah

Hachhek bial tana sawrkar hmalaknaah lawmthu sawi nachang hre turin chief minister Zoramthanga chuan a chah.
Zirtawpnia Kawrthaha Hachhek Joint MNF Block Conference a hmanpuinaah MNF president ni bawk Zoramthanga chuan Hachhek bial chu opposition bial ni mah se, hmasawnna tamtak a hmu a; Kawrtethawveng RD Block, Kawrthah leh Tuidamah khelmual tha leh kawng tha an nei mek tiin, “Hachhek bial mipuiin lawmthu sawi nachang kan hriat ve a ngai. Pathian leh mipui zarah sawrkar siam leh turin ka sawm che u a. Kan hotuten an ngaihsak che u, Hachhek bialah lokal rawh u, in tih hun apiangah kan lokal ang,” a ti.

Congress party chu Delhi lama an khawnvartui bur a buak tawh avangin, a phita a rawpral mek a, Mizoramah pawh a rawpral mek a, beisei tur an awm tawh lo tih a sawi. ZPM pawh a tirah party niloin, peoples’ movement tiin inzuar mah se, nula thianghlim ngaihzawn tlaka an insawi lai mekin an nihna langin an naupai a puar ul tawh a. Election Commission ah in-register in, unit-te an din ve ta zel a. An inzawrh ang an nilo a, kan hrechiang zel a, beisei tur an awm lo, tiin a sawi.