Lawngtlaiah thalaite Kutpui hmang “Mahni inrin tawkna nen khawvel hmachhawn a tul”
Nehru Yuva Kendra, Lawngtlai District leh Government Lawngtlai College tang kawp huaihawtin kar kalta Inrinni khan Central YLA hall, Lawngtlaiah |halaite kutpui, “Yuva Utsav – Lawngtlai District Level Youth Festival” buatsaih a ni a, V. Zirsanga, LADC CEM chuan khuallian niin a hmanpui.
V. Zirsanga chuan, ram hmasawn, ram changkang leh intodelh ni turin hriatna leh thiamna tihpun zel a pawimawh tih sawiin, thalaite chu hriatna lama tuihal a, an theihna tipung zel turin a chah a. Rilru leh ngaihtuahna lama mi dang el pha lo tur nia inngaihna, mi theih ang thei ve lo tura inngaihna chu hmasawnna leh mihring than zelna daltu lian tak a nih thu sawiin, mahni inrin tawkna nen khawvel hmachhawn a, danglamna thlentu nih tum turin a chah.
Khuallian chuan thalai kal khawmte chu mahni hnam ziarang leh nunphung ngaihlu a, ram leh hnam hmangaihna rilru pu tur leh an phak tawka a tha ber ram leh hnam tana sawr chhuak tura chahin, ngaihtuahna thar nen khawvel tukverha dak a, hmasawnna tluantling nei tura ke pen turin a chah bawk a ni.
He hunah hian Lawngtlai Sub-Deputy Commissioner Samuel Lalmalsawma Sailo leh Central Young Lai Association General Secretary Joseph Lalhmingthanga Chinzah te pawhin thalai kal khawmte fuihna thu an sawi a. Swachh Bharat Mission (Grameen) atangin Coordinator Benjamin Lalrinzuala chuan SBM-G hma lakna sawi fiahin, tui renchem leh faina kawnga theih tawp chhuah turin zirlai kal khawmte chu a sawm a. GLTC Associate Professor Pu Mc. Lalrokhuma’n lawm thu sawiin hun a khar a ni.
|halaite Kutpui”-ah hian thupui thlan sa hmanga thu insawi siakna, “declamation contest” leh hnam lam intihsiakna, “cultural dance competition” te buatsaih a ni a. Yuva Utsav thupuiah hian “Panch Pran of Amrit Kaal: India @2047” tih hman a ni a. Kum 2047-ah chuan India ram chu ram hmasawn leh intodelh nihtir te, sal tang rilru atanga chhuah zalen te, hnam ziarang leh hlutna chawi san te, inpumkhatna vawn nun leh khua leh tui tha siam te chu he hma lakna hian a tum a ni.