Minister pahnihin bial sawn dawn

Inthlanpui lo awm turah MNF atangin Robert Romawia Royte, minister-in bial a sawn dawn tih a chiang tawh a, minister dang pakhat pawhin bial a sawn dawn tih a chiang tawhah ngaih a ni.
|awi bialtu, power minister R Lalzirliana chu Aizawl North I-ah a ding dawn tih a chiang tawhah ngaih a ni a, an party Nomination Committee-in la rel lo mah se thil kal dan enin, a chiang tawhah ngaih a ni.
Minister R Zira hi bial dangah a kal dawn tih chu a chianna a rei tawhah ngaih a ni a, Aizawl North I-a ding tura ngaih a nih reng hnuah a chenna bial Aizawl East II a en lehah ngaih a ni. Tunah chuan Aizawl North I-ah a chiangah ngaih a ni ta.
Aizawl North I biala MNF hruaitute nen thil an tiho a, a huanah te pawh hun an hmangho tawh tih thu dawn a ni a, North I bial MNF hruaitute pawhin an bialah a ding dawn tih a chiangah an ngai tih thu dawn a ni.
Aizawl North I-ah a ding dawn tih a chian hian, Aizawl East II-a ding tur pawh a chiang telah ngaih a ni a, East II huam chhunga AMC ward IX bialtu B Lalawmpuii, AMC executive councillor chu he biala ding turah ngaih a ni.
A chhuahsan tur |awi bial ding tur pawh a chiangah ngaih a ni a, Aizawl mayor Lalrinenga Sailo a chiangah ngaih a ni.
MNF party-a an Nomination Committee-in Hachhek biala ding turin Robert Romawia Royte an ruat tawh bak, bial mala tihfel an la nei lo nia hriat a ni a, minister R Zira dinna tur pawh hi tihfel la ni lo mah se a chiangah ngaih a ni.