League champion Bagan

Thawhtan zan khan Indian Super League (ISL 2023-24) League champion tur tihchian a ni a, Mumbai City FC hnehtu Mohun Bagan Super Giant chuan an vawi khat nan ISL League Shield an la. League champion ni nawn tura point khat mamawh Mumbai City hi Lallianzuala Chhangte goal in a chhanhim zo lo.
Vivekananda Yuba Bharati Krirangan Stadium, Kolkata-ah Mohun Bagan leh Mumbai City ten inkhel pawimawh tak an hmachhawn. Lianzuala khelhna Mumbai City hian League champion ni nawn turin tlawm an pumpelh a ngai a, point khat an hmu thei a nih chuan League Shield an la nawn leh dawn. Tlawm pumpelh tum viau mah se an vanneih ni a ni lova, Bagan lakah uiawm takin an tlawm.
League champion ni tura chak ngei ngei mamawh Mohun Bagan hian an mualah bul an tan tha a, Liston Colaco chuan minute 28-naah hmahruaina goal a thun. He goal hmang hian hun rei tak chhung hma an hruai a, Mumbai City in an si phurh sut tum viau mah se Kolkata club lian Bagan tlarhnung an thiat hleithei lo. Mumbai team lianin goal thun an mamawh em em laiin an chhuah belh leh ta zawk, hun tawp dawn hnaih minute 80-naah Jason Cummings chuan Bagan goal hnihna a thun a, an hmahruaina a tizau.
Si hnih an phurh hnuin Mumbai City in si phurh belh huamin an khingpuite an nawr a, an tifuh. Minute 90-naah Lallianzuala Chhangte chuan goal thunin an si phurh a sut then. LZ Chhangte goal thun hnu hian Bagan player Brendan Hamill hnawhchhuah a ni zui leh zat a, champion inchuhna boruak a nung thar leh zual. Goal thun tumin thapui tawh zui mah se Mumbai City FC an hlawhtling zo lova, uiawm takin an elpui lian Mohun Bagan lakah an tlawm a, pahnihna ni chungin league an khar zui ta a ni.
An mualah hnehna pawimawh tak an chan vangin Mohun Bagan hian khelh 22 atangin point 48 an hmu a, hun rei tak chhung hmahruaitu Mumbai City FC chu point khatin an lehpel a. ISL League-ah a vawi khat nan an champion ta a ni. Bagan an champion leh tak vang hian Kolkata club lian pahnih; Mohun Bagan leh East Bengal ten season tharah AFC Champions League 2 an khel dawn.