Lecce manager Roberto an ban

Pathianni Serie A inkhel pakhata sikhat faia Verona an hneh loh tum khan Lecce head coach Roberto D’Aversa thin tertek chhuak chuan a lu hmangin Verona striker Thomas Henry a tauh a, Lecce chuan an manager hi an ban tih Thawhtanni khan an puang.
Kum 48 mi D’Aversa hian Lecce kha game 30 khelhpui hmanin, vawiruk chiah a chakpui a, lehlam player lakah khati khan chet thawh lo pawh ni se ban a hnaih tho tho niin a lang!
Hamrik tawp ber rik ruala inbakkaihna chhuaka an chet dan avangin D’Aversa leh Henry kha red card hmanga hnawhchhuah ve ve an ni a; Lecce boss chuan Stadio Via del Mare inkhel zawha thu a sawiah a chet dan kha thupha chawi ngaihna awm lo khawpa mawi lo a nih thu a sawi.
Pathiannia an tlawm hnu khan Lecce chu Italian top flight table-ah tlahniamin 16-na an luah a, relegation zone an hnaih zel.
League game an khelh hnuhnung 12-ah Lecce hi vawikhat chiah an chak a, vawikua tlawng an tlawm tling!
Nikum nipui thawt lai khan Marco Baroni hmunruak luah turin D’Aversa hi an senglut a, Virtus Lanciano, Parma leh Sampdoria manager hlui hian a chawikang zo lo a, hmingchhe takin an ban zui ta a ni.