Leeds 1-6 Liverpool

April 17, Thawhtan zana English Premier League inkhel awmchhunah Liverpool chuan 6-1 ngawtin Leeds United an sawp. Elland Road-ah 6-1 ngawta an chak a, game nga hnua an chak hmasak ber tum hi season kal meka an khelh that ber tum niin Liverpool manager Jurgen Klopp chuan a sawi.
Elland Road-a lenglut Liverpool hian an khel tha viau naa goal thun nan darkar chanve chuang an ngah ve phawt a ngai thung. Minute 35-naa hmahruaina goal a luh hnuah erawh a khat mawi tawkin goal a lut a, goal sarih ngawt hmuh tur a awm leh lawi. Season kal meka beisei phak lo pahnih: Leeds leh Liverpool te inkhelah hian table-ah pariatnaa awm mek Liverpool tan Cody Gakpo chuan minute 35-naah Alexander-Arnold siamsak tha tak chu goal line bul lawk atangin a pet goal a, hmahruaina goal a thun. Reds in Ajax atanga an lak luh Gakpo a khel tha sawt viau a, season tharah phei chuan Liverpool chakna hnar pawimawh tak a ni leh zual ngeiin a rinawm.
Gakpo-a’n hmahruaina goal a thun hnu lawk hian Liverpool in goal dang an thun belh leh nghal zat. Diogo Jota-an thui tak ball a khalh hnuin Mohamed Salah tan tha takin a chhawpsak a. Aigupta tlangval Salah hian minute 39-naah awlsam taka pet goal in an goal hnihna a thun a. Si hnih faia hma an hruai chungin chawlhlawk an hmang.
Chawlhlawk hnu lamah 16-naa awm mek Leeds United in bul an tan tha a, goal an thun thuai. Luis Sinisterra chuan defender Konate tihsual nangchinin minute 47-naah a pet goal a, an si phurh a sut then. Luis Sinisterra goal thun vangin Leeds hian beiseina thar nei bawk mah se sapui muthlu an kaiharh a ni lek fang a, goal nga ngawt an chhuah belh zui ta hial.
Goal khat an chhuah zeuh vangin Liverpool in goal thun tumin tan an khawh zui leh nghal a, minute 52-naah Diogo Jota chuan Jones ball pek tha tak chu awlsam takin a pet goal a, an hmahruaina tizau nawn leh turin an goal thumna a thum.
Jota goal thun hnu hian Reds in an khingpuite an thunun hneh leh zual a. Goal thum an thun belh leh. Minute 64-naah Mohamed Salah chuan Gakpo siam tha tak chu far post-ah a pet kual lut a, a mimal goal hnihna leh team goal lina a thun. Elland Road-ah an chak ngei dawn tih a chian tawk viau tawh hnuin minute 73-naah Diogo Jota chuan captain Jordon Henderson siamsak atangin an goal ngana a thun a. Hun tawp dawn tep minute 90-naah Darwin Nunez chuan mawi leh fing takin a pet goal zui leh a, game nga chhung ngawt chak ni hmel an hmuh loh hnuin Liverpool chuan hnehna lian an sualchhuak ta nge nge a, point thum an hmu.
Leeds United sawptu Liverpool hian khelh 30 atanga point 47 hmuin pariatna an luah mek a. Champions League khelh phak beiseina an la nei zui zel. Palinaa awm mek Newcastle United nen an inkarah point 9 a tla zep mek a. UCL khel phak turin Reds tan chetsual a thiang tawh lo. Inelna dangah champion beiseina tur an nei tawh lova, Liverpool tum lian ber chu European competition hmachhawn phak a ni dawn a. Europa League an khel phak a nih pawhin chu ngawt chu an tan lungawina tur a ni phak dawn lova, an thlakhlelh ber chu Champions League khelh a ni ang.
An mualah chiang taka an tlawm vangin Leeds United dinhmun a chhe leh zual. Leeds hian khelh 31 atanga point 29 hmuin 16-na luah mek mah se tlahniam thei dinhmuna ding mek Nottingham Forrest nen an inkarah point hnih chiah a tla zep thung. Khawvela league ropui leh rum tamna ber EPL khel chhunzawm turin Leeds hian insiamthat ngei an mamawh ta viau a ni.